«Халқимиз вазиятни тўғри қабул қилиб, саросимага тушмади». Шавкат Мирзиёев — энерготизимдаги носозликлар ҳақида

Президент сешанба куни энерготизимда юзага келган носозликларга муносабат билдириб, узоқ ҳудудлардаги техноген офатлар Ўзбекистонга ҳам ўз таъсирини ўтказмай қолмаслигини таъкидлади. «Халқимиз вазиятни тўғри қабул қилиб, саросимага тушмади. Аввало сабр-тоқатли халқимизга, шунингдек, барча соҳа ва идоралар ходимлари, ОАВ ва ижтимоий тармоқ вакилларига ўз миннатдорчилигимни билдираман», — деди Шавкат Мирзиёев.

Газ қуйиш шохобчалари фаолияти вақтинча чекланади

Энергетика вазирлиги 26 январдан бошлаб автомобилларга газ қуйиш шохобчалари фаолияти вақтинча чекланиши, юридик истеъмолчиларга табиий газ етказиб бериш эса тўхтатилишини маълум қилди. Электр энергия ва табиий газ тўлиқ ҳажмда ИЭС, ижтимоий соҳа объектлари ва аҳолига етказиб берилади.

«Блэкаут» сабаб қишлоқ хўжалиги маҳсулотлари нархи кескин ошиб кетмайди — Қишлоқ хўжалиги вазирлиги

Қишлоқ хўжалиги вазири ўринбосари Шуҳрат Мирзаев электр энергия ва газ таъминотидаги узилишлар ортидан бозорларда қишлоқ хўжалиги маҳсулотларининг нархи кескин ошиб кетмаслигини маълум қилди. Унинг сўзларига кўра, етарли миқдорларда озиқ-овқат маҳсулотлари захираси яратилган, улар муқобил энергияга уланган музлатгич ва омборхоналарда сақланмоқда. Иссиқхоналар эса бир неча кун ичида табиий газ билан таъминланади.

Самарқанд ва Наманганда автобуслар ҳаракати тўхтади, Қорақалпоғистонда эса улар АГТКШлардаги навбатларда қолиб кетмоқда

Газ қуйиш шохобчаларидаги вақтинчалик чекловлар сабаб Самарқанд ва Наманган вилоятларида жамоат транспорти ҳаракати тўхтаб қолди. Қорақалпоғистонда эса автобуслар шохобчаларда юзага келган узун навбатларда қолиб кетмоқда.

Тошкентда газ таъминоти соат 17:00 дан кейин тўлиқ тикланади — Энергетика вазирлиги

Энергетика вазирлиги чоршанба куни соат 17:00 дан кейин газ босими тўлиқ тикланиб, нормал ҳолатда истеъмолчиларга етказилишини маълум қилди.

Кечқурун 18:00 га қадар иссиқ ва совуқ сув таъминоти тўлиқ тикланади

Уй-жой коммунал хизмат кўрсатиш вазири ўринбосари Қурбон Турсунов чоршанба куни соат 18:00 га қадар республика бўйича иссиқ ва совуқ сув таъминоти тўлиқ тикланишини маълум қилди. Унинг сўзларига кўра, айни вақт Тошкент шаҳридаги 1 фоиз хонадонгина иссиқ сув билан таъминланмаган.

COVID-19: Сешанба куни қарийб 1200 кишида коронавирус аниқланди

Кетма-кет икки кунлик пасайишдан сўнг касалланишлар сони яна ортди — сешанба куни 1174 киши коронавирус юқтириб олди. 4 нафар бемор эса вафот этди. Қолаверса, 114 кишида пневмония аниқланди.

2021 йилда Ўзбекистон 809 дона электромобиль импорт қилган

2021 йилда Ўзбекистонга қиймати 16,9 млн долларга тенг бўлган 809 та электромобиль импорт қилинган. Уларнинг 90% Хитойдан олиб келинган. Электромобиллар импорти 2020 йилга нисбатан 679 тага ёки 6,2 бараварга ошган.

1 февралдан умра сафарига авиарейслар ҳар куни амалга оширилади

Ўзбекистон мусулмонлари идораси умра сафарига 1 февралдан бошлаб Саудия Арабистонига ҳар куни биттадан авиарейс амалга оширилишини маълум қилди. 10 февралдан эса ҳар куни 2 тадан, Рамазон ойи давомида эса ҳар куни 3 тадан авиа қатнов йўлга қўйилади.

1992−1994 йилларда Афғонистондан кириб келган 15,5 тонна наркотик моддалар тасвирлари эълон қилинди

1992−1994 йилларда Давлат божхона қўмитасининг Сурхондарё вилояти бошқармаси томонидан Афғонистондан Ўзбекистонга олиб ўтилаётган 15 тонна 447 кгдан кўпроқ гиёҳвандлик моддалари, шу жумладан, 1167 кг «гашиш» тўхтатиб қолингани акс этган тарихий лавҳалар эълон қилинди. Юклар ортилган контейнерлар дарё орқали кемаларда олиб келинган.

Тошкент ҳокимлиги ҳузуридаги корхона ходими ва шериклари пора олаётганда ушланди

Пойтахт ҳокимлиги ҳузуридаги «Муниципал активларни бошқариш маркази» ДУК ходими 3 шериги билан 30 сотих ерни 420 минг долларга сотмоқчи бўлиб, 42 минг долларни аванс сифатида олган вақтида ушлангани айтилмоқда. Жиззах ва Самарқандда Давлат кадастрлар палатасининг туман филиалларида раҳбар ва ходим, Сирдарёда эса бир фуқаро коррупцияда гумонланиб, қўлга олинган.

Ўзбекистонликларни Мексика орқали АҚШга жўнатишга ваъда қилган шахслар ушланди

Самарқандда уч нафар фуқарони 60 минг доллар эвазига Мексика орқали АҚШга жўнатишга ваъда қилган эркак қўлга олинди.

Газ таъминоти босқичма-босқич тикланмоқда — «Ҳудудгазтаъминот»

«Ҳудудгазтаъминот» корхонаси Тошкент шаҳри ва Ўзбекистоннинг бошқа ҳудудларида газ таъминоти босқичма-босқич тикланаётганини маълум қилди. Аҳолидан: «газ плиталарини, иситиш ва сув иситгич асбобларини ҳамда дудбуронларни пухта текшириш» сўралди. Электр жиҳозларини ёқишдан олдин хонада газ ҳиди йўқлигига ишонч ҳосил қилиш ва фақат шундан кейингина электр энергиясидан фойдаланиш кераклиги эслатиб ўтилди.

Ўзбекистон илк бор валюта биржасига муддати 10 йил бўлган облигацияларни жойлаштирди

Ўзбекистон илк бор валюта биржасига 10 йил муддатга 10 млрд сўмлик давлат облигацияларини жойлаштирди. Бундан ташқари, 174,5 млрд сўмлик муомала даври 5 йил бўлган облигацилар ҳам биржага чиқарилди.

Ўзбекистонда 2021 йилда жами 107,4 трлн сўмлик қурилиш ишлари бажарилди

2021 йил якунларига кўра, Ўзбекистонда жами 107,4 трлн сўмлик қурилиш ишлари амалга оширилди. Бу кўрсаткич 2020 йилган нисбатан 6,8 фоиз ёки 19,3 трлн сўм кўпроқни ташкил этган. Қурилишларнинг 94,8 фоизи нодавлат ташкилотлар ҳисобига тўғри келган.

Ўзбекистонда 2021 йилда ўртача ойлик иш ҳақи 3,2 млн сўмни ташкил қилди

Статистика қўмитаси Ўзбекистонда 2021 йилда ўртача ойлик иш ҳақи 20 фоизга ўсиб, 3,2 млн сўмга етганини маълум қилди. Бироқ ушбу рақамлар амалдагисидан фарқ қилиши мумкин. Бунга сабаб қишлоқ хўжалиги ва кичик бизнес субъектлари бўйича кўрсаткичлар умумий статистикада акс этмаган.

Драматург ва сценарист Шароф Бошбеков оламдан ўтди

Таниқли ёзувчи, драматург ва сценарист Шароф Бошбеков 71 ёшида оламдан ўтди. У «Темир хотин», «Масхарабоз», «Фарҳод ва Ширин» каби фильмлар, «Чархпалак» видеофильмининг сценарийларига муаллифлик қилган.