Евроосиё ҳукуматлараро кенгаши Ўзбекистоннинг тўрт йўналишда, жумладан, темир йўл транспортини рақамлаштириш, «Евроосиё Экспресс» лойиҳаси ва бошқа йўналишларда ЕОИИ ишидаги иштирокини кенгайтириш ташаббусини қўллаб-қувватлади. Шунингдек, бош вазир Абдулла Арипов темир йўл ва автомобиль транспортида йўловчи ташишни тиклашни таклиф қилди.

Давлат хизматлари агентлиги эски ҳайдовчилик гувоҳномасини мажбурий алмаштириш муддати тугаётгани муносабати билан мурожаатчилар сони кескин ортганини маълум қилди. Жумладан, январь ойига (21,9 минг) қараганда февралда (49,8 минг) икки баравар кўп хизмат кўрсатилган. Шу боис, энди пойтахтнинг 10 та туманидаги ДХМлар янги гувоҳномани бериш учун сўнгги мижоз қолгунича фаолият кўрсатади.

Ташқи ишлар вазири Абдулазиз Камилов БМТнинг Ўзбекистондаги доимий координатори лавозимига тайинланган Роли Астханани қабул қилди.

25 февраль куни Евросиё ҳукуматлараро кенгаши аъзолари йиғилишида бош вазир Абдулла Арипов Ўзбекистон Евроосиё тараққиёт банкига аъзо бўлишга тайёрланаётганини таъкидлади.

Украина президенти Владимир Зеленский РФ президенти Владимир Путинга музокаралар столи атрофида учрашишни таклиф этди. Украина раҳбари «одамларнинг ҳалок бўлишини тўхтатиш учун музокаралар столига ўтириш» кераклигини таъкидлаган.

ИТСВ раҳбарининг биринчи ўринбосари Лазиз Кудратов ва Европа парламентининг ташқи ишлар бўйича қўмитаси раиси Дэвид Макаллистер Ўзбекистоннинг ЖСТга аъзо бўлиши ҳамда «GSP+» Преференциялар бош тизимидан фойдаланиш доирасида ҳамкорликни янада кенгайтириш масалаларини муҳокама қилдилар.

Долларнинг сўмга нисбатан расмий курси 9,15 сўмга кўтарилиб, 10 860 сўмни ташкил этди. Евро курси пасайди, рубль курси эса кўтарилди.

Санитария-эпидемиологик осойишталик хизмати раҳбари Баҳодир Юсупалиев март, июнь ва июль ойларида яна 4 млн доза Pfizer, 7,5 млн доза Moderna вакцинаси олиб келинишини маълум қилди. Қолаверса, Ўзбекистонда яна 10 млн доза ўзбек-хитой вакцинаси ҳам ишлаб чиқарилган.

Халқ таълими вазирлиги 2021 йилда таълим муассасалари 91,1 млрд сўмлик молиявий хатога йўл қўйгани, шундан 27,1 млрд сўмни талон-торож қилганини аниқлади. Биргина Андижон шаҳрида ходимларнинг даромад солиғи бюджетга ўтказилмасдан, 11,5 млрд сўм ўзлаштирилган. Аввалроқ, 2018−2020 йилларда Андижон шаҳар ХТБ раҳбарлари 57 млрд сўм талон-торож қилгани айтилганди.

УЕФА Европадаги хавфсизлик билан боғлиқ вазият жиддий тус олгани туфайли бу йилги Чемпионлар лигаси финалини Санкт-Петербургда эмас, Парижда ўтказиш тўғрисида қарор қабул қилди.

Дам олиш кунлари Ўзбекистонда қиш фаслига ҳос бўлмаган жуда илиқ ҳарорат бўлиши кутилмоқда. Бу Эрон ҳудудларидан кириб келадиган ҳаво ҳисобига юз беради. Ҳарорат кундуз кунлари +23…+25 даражагача кўтарилади. Февралнинг сўнгги кунида эса Фарғона водийсидан бошқа барча ҳудудда ёмғир ёғади.

Владимир Зеленскийнинг офиси Украина Россия билан нейтраллик мақоми ҳақида музокараларга тайёрлигини эълон қилди. Украина мамлакат хавфсизлиги бўйича кафолатлар берилиши кераклигини ҳам таъкидлаган.

Bloomberg нашри Россиянинг Украинага бостириб кириши оқибатида россиялик миллиардерлар 39 млрд йўқотганлигини маълум қилди. «Лукойл» президенти Вагит Алекперов 6,2 млрд доллар йўқотган бўлса, Алишер Усмоновнинг бойликлари 1,2 млрд долларга камайган.

Пайшанба куни 156 кишининг COVID-19`га торширган тест таҳлили мусбат натижани кўрсатди, бир кун олдин ушбу кўрсаткич — 140 тани ташкил қилганди. Қолаверса, 26 кишида пневмония аниқланди.

«Hududgaz Jizzax» газ таъминоти филиали ходимлари тадбиркорнинг 384,6 млн сўмлик қарзини пора эвазига камайтириб бермоқчи бўлган. Улар пора олган вақтида қўлга олинган.

Шавкат Мирзиёев Қорақалпоғистонга ташрифи эълон қилинган санадан бир кун олдин якунлади. Сафар уч кунга режалаштирилган эди.

Украина президенти Владимир Зеленский Россия ҳужумлари натижасида 137 нафар ҳарбий ҳалок бўлгани, 316 нафари жароҳатланганини таъкидлади. У Киевда «халқи билан якка ўзи қолганини» маълум қилган. «Биз ватанимиз ҳимояси масаласида ёлғиз қолдик, ҳеч ким биз билан биргаликда жанг қилишни хоҳламаяпти», деган давлат раҳбари.

Тошкент шаҳрида ўзини метро поезди остига ташлаган эркак Сирдарёнинг Сардоба туманидан бўлган. У воқеа жойида вафот этган.

«Қонхўр тажовузкор, варварларча қилинган авантюра», «шафқатсиз ҳужум», «халқаро тартиб учун оқибатларга олиб келадиган вазият» — дунё етакчилари Россиянинг Украинага бостириб киришини қоралади. АҚШ, Буюк Британия, Канада, Европа Иттифоқи, Япония янги санкцияларни эълон қилди.

Олий таълим вазири Абдуқодир Тошқулов ўзининг талабалик йиллари, илгари ОТМга ҳужжат топширишда кузатилган қийинчиликлар, талабалар ўртасидаги маҳаллийчилик, пул топиш учун қора иш қилишга тўғри келгани ҳақида сўзлаб берди. Қолаверса, сессияда фанларни ёпиб юрган йилларини эсга олар экан, 5 баҳо эвазига 4 «тележка» сомон ташиттирган устозини университетга ректор бўлгач, иккита шарт билан ишга олганини айтди.