«Узоқ кутдик, тайёрландик, охири буни уддаладик», — дея қисқа жавоб қайтарган Украина мудофаа вазирлиги Бош разведка бошқармаси бошлиғи Кирилл Буданов Украина бўйлаб навбатдаги зарбалар йўллашда қатнашган Россиянинг Ту-22МЗ стратегик бомбардимончи самолёти қандай уриб туширилгани ҳақида.

«Ўтган ҳафтани „пистирма“ ҳафтаси дейиш мумкин. У керакли нуқтага келишини кутдик», — дея изоҳлаган разведка раҳбари BBC Украина хизмати мухбири билан суҳбатда. У тафсилотларни очиқлашни истамаслигини билдирган. Аммо самолёт 308 км масофада йўқ қилинганини айтган. Ва унга зарба бериш учун аввалроқ А-50 самолётини ҳавода йўқ қилиш учун қўлланган усул ва воситалардан фойдаланилган.

Бош разведка бошқарма маълумотига кўра, Россияда ҳали бундай самолётлардан яна бор. «Аммо бу мазкур урушда шундай масофада ҳаракатланувчи самолётнинг илк бор уриб туширилиши бўлди. Одессадагиларга энди осонроқ бўлади», дея қайд этган у.

Буданов Ту-22М3 самолёти Одессага энг кўп вайронгарчиликлар келтирган Х-22 ракеталарини учирганини қайд этган. Унинг сўзларига кўра, бундай кучли ва тез учувчи ракеталарни «тутиб олиш имконсиз».

Аммо, советлар даврида ишлаб чиқарилгани учун бундай ракеталарнинг аниқлиги «у қадар катта эмас». Шунинг учун ҳам «фуқаролик қурилмаларининг катта қисмини айнан шундай ракеталар» вайрон қилган.

«Энди россияликлар ракеталар учириш учун янги учириш майдонлари қидиришига тўғри келади ва улар Одессага зарба бериш учун фақат қуруқликдаги комплекслар, узоқ масофали авиация ва денгиздан фойдаланишга мажбур бўлади», — деган Буданов.

«Мен умид қиламанки, энди Х-22 ракеталарини кўрмаймиз», — дея тахмин қилган украинларнинг бош разведкачиси.

«Биринчи зарба ёки техник носозлик»?

Аввалроқ украиналик ҳарбийлар 19 апрел куни илк бор россияликларнинг Ту-22М3 русумли стратегик бомбардимончисини уриб туширишга муваффақ бўлишганини маълум қилишганди. Бу Х-22 қанотли ракеталари ташувчиси ҳисобланади, у жума куни амалга оширилган навбатдаги ёпирилма зарбаларда иштирок этган бўлиши мумкин.

Бу ҳарбий разведка ва Ҳаво кучларининг қўшма амалиёти бўлгани маълум қилинган. Разведка матбуот хизмати штабда самолётга зарба берилган вақтда олинган видеони намойиш этган.

«Барча ишда биринчи мартаси бўлади. Биз ўз вақтида „Кинжал“ни биринчи марта уриб туширганди, „Циркон“ни ҳам. Мана Ту-22ни ҳам биринчи бор уриб туширдик. Энди эса Ту-95ни ҳам кутамиз», — деган Ҳаво кучлари спикери Иля Евлаш «Озодлик радиоси» эфирида.

Бу вақтда эса Россия мудофаа вазирлиги Ту-22М3 ракета ташувчиси «жанговар вазифани бажариб қайтаётганида қулаб тушгани»ни маълум қилган. Қулашга «техник носозлик» сабаб бўлган бўлиши мумкинлиги айтилган.

Россия нашрларида тарқалган хабарларга кўра, самолёт Ставропол ўлкасидаги бўш жойга тушган.

«Пилотлар катапулта қилинган, экипажнинг уч аъзоси топилган, яна бир пилотни қидириш ишлари олиб борилмоқда», — дея хабар берган вазирлик.

Кейинроқ Россиядаги РИА Новости давлат ахборот агентлиги маҳаллий губернаторга таяниб, камида бир учувчи ҳалок бўлгани ҳақида ёзди.

«Қонуний нишон»

НАТО бош котиби Йенс Столтенберг Россия бомбардимончиси уриб туширилганига муносабат билдираркан, бу Украинанинг ўзини ҳимоя қилиш ҳуқуқи доирасида рўй берганини айтди.

«Биз ёдда тутишимиз керакки, бу ҳарбий тажовуз: Россия Украинага ҳужум қилган. Украина ўзини ҳимоя қилишга ҳақли. Ва бу Украина ташқарисидаги нишонларга ҳам зарба беришни ўз ичига олади», — деган Йенс Столтенберг Украина- НАТО кенгаши йиғилишидан кейинги матбуот анжуманида.

Йиғилиш аъзо мамлакатларнинг мудофаа вазирлари даражасида ўтказилган, уни ўтказиш ташаббуси президент Зеленскийдан чиққан, у бу ҳақда Россиянинг сўнгги ёпирилма зарбаларидан кейин сўраганди.

«Путинни осмондан ерга тушириш лозим»

Кенгаш иштирокчилари қаршисида видеоалоқа орқали чиқиш қилган Украина президенти Володимир Зеленский «Путинни осмондан ерга тушириш лозимлиги» ҳақида гапирган.

У «Украина осмонини хавфсиз қилиш» — амалга оширса бўладиган вазифа экани ҳақидаги тезисини яна бир бор такрорлаган. Украина президенти ўтган ҳафтада Эрон Исроилга ҳужум қилганида Исроил ва иттифоқчилари юзлаб ракета ва дронларнинг қарийб барчасини уриб туширишга муваффақ бўлганидан кейинги деярли ҳар бир чиқишида шу ҳақда гапирмоқда.

«Бу тўлиғича сизнинг танловингизга боғлиқ. Бу инсон ҳаёти ҳамма жойда ҳам бир хилда қадрланадими ёки йўқлигини кўрсатувчи танловдир. Бу сиз барча ҳамкорларга ҳам бир хилда қарашингизни кўрсатиш учун танлов. Чиндан ҳам биз иттифоқчилар эканимиз ҳақидаги танлов», — деган Володимир Зеленский.

Йиғилиш якунида НАТО раҳбари «ёрдам аллақачон йўлда» экани ва тез орада Украинага янги ҳаво ҳужумидан мудофаа тизимлари ҳамда Россия тажовузига қарши курашиш учун бошқа воситалар етказиб берилишини маълум қилди. “Замин” янгиликларини “Youtube”да кузатиб боринг