20 октябрь куни Инвестициялар ва ташқи савдо вазирлигида DP World компанияси вакиллари билан учрашув бўлиб ўтди. Бу ҳақда вазирлик матбуот хизмати хабар берди.

Учрашувда компаниянинг Ўзбекистондаги инфратузилмавий ривожланиш, логистика ва электрон тижорат соҳасидаги бир қатор инвестиция лойиҳаларини амалга оширишда иштирок этиш истиқболлари кўриб чиқилди.

DP World вакиллари Ўзбекистоннинг инвестициявий муҳити, хорижий инвесторлар учун жорий қилинган имтиёз ва преференциялар ҳамда уларнинг фаолияти кафолатининг меъёрий — ҳуқуқий базаси билан батафсил танишди.

Транспорт-логистика хизматларини кўрсатиш, жумладан, транспорт-логистика марказларини яратиш ва логистика жараёнларини оптималлаштириш бўйича хизмат кўрсатиш, шунингдек, эркин иқтисодий ва кичик саноат зоналарини ривожлантириш каби йўналишлар Ўзбекистонда компаниянинг самарали фаолияти учун энг жозибали ва устувор йўналишлар сифатида кўриб чиқилди.

Музокаралар якунида компания вакиллари Тошкент вилоятида замонавий логистика марказини қуришга қизиқиш билдирди, ўз навбатида вазирлик раҳбарияти қўшма лойиҳаларни амалга оширишни ҳар томонлама қўллаб-қувватлашга тайёрлигини тасдиқлади.

Маълумот учун, DP World дунёдаги энг йирик порт операторларидан бири бўлиб, 2005 йилда Dubai Ports Authority ва Dubai Ports International бирлашиши натижасида ташкил этилган. Компания 78 та денгиз ва ички терминалларга эга. Улар компаниянинг олтита қитъанинг 40 мамлакатидаги 50 дан ортиқ корхоналари томонидан бошқарилади. Компания асосан ривожланаётган ва ривожланган бозорларда фаолият юритади. Унинг таркибига портлар ва терминаллар, саноат парклари, логистика ва иқтисодий зоналар, яхталар тўхтайдиган жойлар киради.