Россия Ташқи ишлар вазирлиги расмий вакили Мария Захарова НАТО бош котиби Йенс Столтенбергнинг Украинанинг Россия ҳудудидаги нишонларга зарба беришига қўйилган чекловларни бекор қилишга чақирувини танқид қилди.

“Столтенберг НАТО давлатларини Киев режимининг Россия бўйлаб нишонларга ҳужумларига қўйилган чекловларни олиб ташлашга чақирди. Буни Швейцариядаги тахминий «тинчлик конференцияси»га таклиф қилинган ҳар бир киши билиш фойдали бўлади”, — деб ёзди дипломат ўзининг Телеграм-каналида.

Аввалроқ Захарова ижтимоий тармоқдаги постида Украина бўйича Швейцариядаги тинчлик конференциясини «яна бир фирибгарлик» деб атаган эди.

“(Украина ташқи ишлар вазири Дмитрий) Кулеба Швейцарияда айтиб ўтган «тинчлик саммити»га келсак, бу АҚШ Давлат департаменти томонидан ўйлаб топилган яна бир фирибгарликдир. Ва буни ҳамма тушунади. Қандай қилиб гўёки тинчлантирувчи ташаббуслар билан тўқнашув зонасини қурол билан таъминлаганлар «тинчлик конференцияси» ўтказиши мумкин?"

Шу билан бирга, у Европа Иттифоқининг ташқи ишлар ва хавфсизлик сиёсати бўйича олий вакили Жосеп Боррелнинг «Киев режимига қурол етказиб беришни тўхтатиш қон тўкилишини бир неча ҳафта ичида тўхтатади», деган сўзларига эътибор қаратди. “Бу ҳақиқий «тинчлик формуласи», дейди Захарова.