Саудия Арабистонининг Ар-Риёд шаҳрида от спортининг конкур йўналиши бўйича ўтказилаётган жаҳон кубоги мусобақасида мамлакатимиз чавандози муваффақиятли иштирок этмоқда.

Мукофот жамғармаси 2,6 миллион еврога тенг мазкур мусобақанинг конкур баҳсларида ҳамюртимиз, 22-рақам остида ҳаракат қилган Нуржон Туякбоев «Квинтус» лақабли тулпорида баландлиги 160 сантиметр бўлган тўсиқлардан ўтиш йўналишини муваффақиятли якунлади ва финал йўлланмасини қўлга киритди. 66.28 секунд тезликда ҳаракат қилган спортчимиз финалга йўл олиш учун атиги иккита тўсинни тушириб юборди, холос.

Энди Нуржон Туякбоев учинчи тартиб рақами остида жаҳон кубоги финалида мусобақанинг биринчи рақамли чавандози сифатида таснифланган швециялик Хенрик фон Эккерманга қарши баҳсда ғолиблик учун кураш олиб боради.

Жаҳон кубоги беллашувлари 20 апрелга қадар давом этади.