23 апрель куни юз минглаб аргентиналиклар, айниқса, талабалар Буенос-Айрес кўчаларига чиқиб, президент Хавер Милейнинг олий таълим секторидаги бюджетни қисқартирганига норозилик билдиришди. Бу ҳақда Deutschэ Wелле хабар берди.

Бу Милей ҳокимиятга келганидан бери унга қарши ўтказилган энг йирик намойишлардан бири бўлмоқда. Талабалар, ота-оналар, ўқитувчилар, университет ходимлари, шунингдек, касаба уюшмалари аъзолари ва мухолиф партиялар пойтахт марказига тўпланиб, президент қароргоҳи томон юришган.

Талабалар норозилигига ҳукуматнинг 2024-ўқув йили учун инфляция даражаси 288 фоизга етганига қарамай, университетлар бюджетини оширмаслик ҳақидаги қарори сабаб бўлган. Милей лавозимга киришгандан сўнг эълон қилган Аргентина учун “шок терапияси” доирасида университет бюджетларини музлатишга қарор қилинган.

Бу, биринчи навбатда, давлат харажатларини сезиларли даражада қисқартиришни назарда тутади. Шу йўл билан янги президент инфляцияни жиловлашга умид қилмоқда. Ушбу чора-тадбирлар туфайли мамлакатда 16 йил ичида биринчи марта бюджет профицити қайд этилди.

Буенос-Айрес бепул университетининг баъзи факультетлари аллақачон харажатларни тежаш бўйича фавқулодда чора-тадбирларни, жумладан, умумий жойларда ёритишни камайтириш, лифтлардан фойдаланишни чеклаш ва кутубхонанинг иш вақтини қисқартиришни жорий қилган. Лотин Америкасидаги энг йирик университет тежамкорлик чоралари туфайли ёпилишидан хавотирда.