Учинчи кундирки, Алексей Навалний ўз даъволари бўйича суд мажлисларига уланмаяпти, деди мухолифатчининг матбуот котиби. Ўтган ҳафта сиёсатчи колонияда касал бўлиб қолгани ва унга томизғич қўйилгани маълум бўлганди.

Владимир вилоятидаги 6-сонли қаттиқ тартибдаги ахлоқ тузатиш колониясида сақланаётган россиялик мухолифатчи Алексей Навалнийга кетма-кет учинчи кун адвокатлар билан учрашишга рухсат берилмади. Бу ҳақда 8 декабр, жума куни сиёсатчининг матбуот котиби Кира Ярмиш маълум қилди.

Унинг сўзларига кўра, Навалнийнинг адвокатлари нафақат ИК-6, балки 7-сонли махсус режимли ахлоқ тузатиш колониясига ҳам келган. «Ҳамма жойда «кутиб туринг» дейишди ва охир-оқибат учрашув тақдим этишдан бош тортишди», деб ёзади Ярмиш X ижтимоий тармоғидаги саҳифасида, у бу «айниқса ташвишли» эканлигини қўшимча қилди, чунки ўтган ҳафта Навалний касал бўлиб қолган - унинг боши айланиб, ҳолсизланган.

«Колония ходимлари зудлик билан югуриб келиб, каравотни тушириб, Алексейни ётқизиб, томизғич қўйди. Бу нима эканлигини билмаймиз, лекин у овқатдан маҳрум бўлганини, вентиляциясиз жазо камерасида сақланганини ҳисобга олсак, ҳушидан кетганга ўхшарди. Ўша воқеадан сўнг адвокатлар Алексейни кўришди, у нисбатан яхши эди. Аммо учинчи кундирки, биз унинг қаердалигини билмаймиз», деди Ярмиш.

Навалнийнинг матбуот котиби, шунингдек, сиёсатчидан бу ҳафта ҳеч қандай хат келиб тушмагани, унга юборилганлар эса етказилмаганини айтди. Бундан ташқари, Ярмишнинг сўзларига кўра, сўнгги уч кун ичида Навалний ўз даъволари бўйича суд мажлисларига видео-алоқа орқали уланмаган. Колония ходимлари буни «авария» ва электр энергияси йўқлиги билан изоҳлади.