Қўшма Штатлар Хитойнинг бўлажак президентлик сайловлари натижаларига таъсир ўтказишга уринишлари исботини топди. Бу ҳақда АҚШ Давлат котиби Энтони Блинкен Пекинга ташрифи якунлари бўйича CNN телеканалига берган интервьюсида айтиб ўтган.

“Умуман олганда, биз [сайловга] таъсир ўтказиш ва, эҳтимол, аралашишга уринишлар гувоҳи бўлдик. Биз бундай ҳаракатлар имкон қадар тезроқ тўхтатилишига ишонч ҳосил қилишни истаймиз”, — деган у. Давлат котибининг таъкидлашича, Қўшма Штатлар ўз сайловларига ҳар қандай мумкин бўлган аралашувни “жуда яқиндан кузатиб боради” ва уларга таъсир ўтказишга уринишларни “мутлақо қабул қилиб бўлмас” деб ҳисоблайди. Унинг фикрича, Хитой ва бошқа мамлакатлардан келаётган бундай ҳаракатлар таҳдиди мавжуд. Америка ташқи сиёсат департаменти раҳбари учинчи давлатлар АҚШдаги президентлик пойгаси натижаларига аниқ қандай таъсир кўрсатиши мумкинлигига аниқлик киритмаган.

Январь ойида CNN телеканали манбаларга таяниб хабар берилганидек, Хитой раҳбари Си Цзиньпин ноябрь ойида Сан-Францискода бўлиб ўтган Осиё-Тинч океани иқтисодий ҳамкорлиги саммитида АҚШ етакчиси Жо Байденни Пекин АҚШда бўлиб ўтадиган сайловларга аралашиш ниятида эмаслигига ишонтирганди.