^{Фото: AP Photo}
Эронда собиқ депутат Зуҳра Илоҳиён навбатдан ташқари президентлик сайловларида номзод сифатида рўйхатга олинган биринчи аёл бўлди. Бу ҳақда Al-Mayadeen хабар берди.

У мамлакат ютуқларидан ғурурланишини таъкидлаб, ёшлар салоҳиятини ишга солувчи, сиёсий ва ижтимоий эркинликларни қадрлайдиган бошқарувнинг янги версиясини жорий этишга ваъда бермоқда.

“Ҳукуматимнинг шиори — соғлом ҳукумат, соғлом иқтисодиёт ва соғлом жамият”, — дейди аёл номзод.

Сайловга Эроннинг бир қанча таниқли сиёсий арбоблари ҳам номзодини қўйган. Улар орасида парламент собиқ раҳбари Али Ларижоний, Эрон Миллий хавфсизлик олий кенгашининг собиқ раҳбари Саид Жалилий ҳам бор. Жалилий ташқи сиёсат, хусусан, Ғарб ва АҚШ билан музокаралар ва алоқаларга доир қатъий позицияси билан танилган.

Бундан ташқари Эрон собиқ президенти Маҳмуд Аҳмадинажод ҳам президентлик сайловларида номзод сифатида рўйхатга олинган. У қашшоқликка қарши кураш ва аҳоли фаровонлигини оширишни ўзининг устувор вазифаларидан бири деб атади. Аҳмадинажод 2005 йилдан 2013 йилгача президент бўлган. Унинг 2009 йилдаги баҳсли қайта сайланиши бутун мамлакат бўйлаб кенг кўламли норозиликларга сабаб бўлган, ўнлаб одамлар ўлдирилган ва минглаб одамлар ҳибсга олинган.

2017 ва 2021 йилларда Аҳмадинажодга сайловларда иштирок этишига рухсат берилмаган. Ўн икки исломий уламо ва ҳуқуқшуносдан иборат “Конституцияни қўриқлаш кенгаши” деб аталувчи ташкилот шундай қарорга келганди.

30 май куни Эронда президентлик сайловлари учун номзодларни рўйхатга олиш бошланди. У 3 июнгача давом этади. Иштирокчиларнинг якуний рўйхати 11 июнь куни эълон қилинади. Муддатидан олдин президентлик сайловлари 28 июнга белгиланган.

Эслатиб ўтамиз, 19 май куни Эрон президенти Иброҳим Раисий авиаҳалокат натижасида вафот этди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди.

Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган. “Замин” янгиликларини “Youtube”да кузатиб боринг