![Detail image](https://dnews.uz/img/assets_front/img/news/xabar/xabar6697b5576df65.jpg)
Мармарис – Туркиянинг жануби-ғарбий қисмида, Эгей ва Ўрта ер денгизи чорраҳасида жойлашган ноёб порт шаҳарлардан биридир. Мармарис ўзининг ажойиб табиати, мусаффо денгизи, тарихий бойликлари ва жонли тунги ҳаёти билан дам олувчиларни ўзига жалб қилиб келмоқда.
Пляжлар ва табиий мўъжизалар
Ичмелер пляжи: Ичмелер пляжи Мармарис марказидан тахминан 8 км узоқликда жойлашган бўлиб, ўзининг майин қуми ва сокин денгизи билан ном чиқарган. Пляжда сув спорти билан шуғулланиш ёки денгиздан баҳра олиш мумкин.
Турунч пляжи: Турунч пляжига Мармарисдан қатнайдиган қайиқ билан борса бўлади, ушбу пляж тинч ва осойишта муҳитда дам олишни истаганлар учун айни муддао. Турунчнинг шаффоф сувларида сузиш бетакрор завқ бағишлайди.
Кумлубук пляжи: Мармариснинг энг тоза ва энг чиройли пляжларидан бири бўлган Кумлубук ўзининг бебаҳо табиати билан бошқа жойлардан батамом фарқланади ва табиатсеварларнинг энг севимли дам олиш масканига айланиб улгурган.
Мармарис миллий боғи: Табиатда сайр қилиш ва осойишта муҳитда ором олиш учун идеал бўлган ушбу парк Мармариснинг ажойиб табиатини кашф қилишни хоҳлайдиганлар учун такрорланмас имкониятдир.
Тарих ва маданият
Мармарис қалъаси ва археология музейи: Мармарис қалъасининг тарихи милоддан аввалги 1 044 йилга бориб тақалади ва бугунги кунда қалъада Мармарис археология музейи жойлашган. Музейда вилоят тарихига оид муҳим асарлар ва осори-атиқалар мавжуд.
Книдос қадимий шаҳри: Книдос қадимий шаҳри Мармарисдан тахминан 1,5 соат узоқликда жойлашган бўлиб, ўзининг қадимий харобалари ва таассуротга бой манзараси билан ташриф буюрувчиларни мафтун этади.
Фаолият ва ўйин-кулги
Қайиқ саёҳатлари: Мармарисдан ташкил этилган қайиқ саёҳатлари билан атрофдаги кўрфазлар ва оролларни кашф қилиш мумкин. Далян, Клеопатра ороли ва Седир ороли каби машҳур сайёҳлик манзиллари табиат ва тарихсеварлар учун мукаммал «бекатлар»дир.
Сув спорти: Мармарисда жет ски (сув спорти), сув чанғиси ва шамол сёрфинг каби кўплаб сув спортларини нафақат синаб кўриш, балки ҳаяжонга бой саргузаштга эга бўлиш мумкин. Шунингдек, шўнғиш ихлосмандлари учун ўрганишга арзигулик Мармариснинг сув ости дунёси мавжуд.
Жип Сафари: Мармариснинг табиий гўзалликлари ва қишлоқ ҳаётини кашф қилиш учун жип сафарларига чиқиш мумкин. Ушбу саёҳатлар қизиқарли ва маълумот берувчи тажрибани таъминлайди.
Тунги ҳаёт: Мармариснинг тунги ҳаёти жуда жонли ва тунни қизғин ўтказадиганлар учун кўплаб вариантларни таклиф этади. Мармарис ўзининг жонли мусиқа барлари, тунги клублари ва турли кўнгилочар жойлари билан тунги ҳаётни севувчилар учун шоҳона тажриба тақдим этади.
Харид қилиш ва озиқ-овқат ва ичимликлар
Маҳаллий лаззат: Мармарисда денгиз маҳсулотларидан таом тайёрлайдиган ресторанларнинг кони мавжуд. Бундан ташқари, турк ошхонасининг лаззатларини тақдим этадиган ресторанлар ҳам йўқ эмас. Айниқса, тами оғизда қоладиган янги балиқ ва газаклардан татиб кўриш тавсия қилинади.
Мармарис Гранд бозор: Ушбу бозорда ҳадя ва эсдалик учун маҳаллий ҳунармандчилик, заргарлик буюмлари, тўқимачилик маҳсулотлари ва аксессуарлар сотилади.
Мармарис барча турдаги дам олувчиларни ўзига жалб қиладиган жой сифатида унутилмас дам олиш тажрибасини тақдим этади. Шунингдек, ажойиб пляжлар, тарихий ва маданий бойликлари, табиий мўъжизалари ва жонли тунги ҳаёти билан дам олишингизни тўла-тўкис ўтказиш имконини беради. Мармарисдаги таътил сизга дам олиш ва кашфиёт нуқтаи назаридан ноёб хотираларни беради.