АҚШнинг собиқ президенти ва президентликка номзод Доналд Трамп ўзига суиқасд уюштирган Бутлер шаҳрида навбатдаги сайловолди ташвиқоти митингини ўтказади.

"Мен ўт ўчирувчи қаҳрамоонимиз Кори ва икки ҳафта олдин яраланган ўша жасур ватанпарварлар шарафига катта ва чиройли митинг ўтказиш учун Пенсилвания штати Бутлерга қайтаман", деб ёзган Трамп ўзининг Truth Social саҳифасида.

Сиёсатчининг постида митинг қачон ва айнан қаерда бўлиб ўтиши ҳақида батафсил маълумот берилмаган. Бироқ, Трамп кампанияси яқинда содир бўлган суиқасддан сўнг ёпиқ жойларда митинглар ўтказишни режалаштирмоқда, дея хабар беради кампаниядан хабардор манбалар.

Эслатиб ўтамиз, 13 июль куни Трампнинг Пенсилвания штатидаги сайловолди митинги вақтида 20 ёшли Томас Метю Крукс сиёсатчи гапираётган саҳнадан тахминан 120 метр узоқликда жойлашган бино томидан ўт очди.

Бир киши, 50 ёшли ўт ўчирувчи Кори Комператор ҳалок бўлди, яна икки киши яраланди, Трамп эса ўнг қулоғидан жароҳат олди. Отишма содир этган шахс АҚШ Махфий хизмати томонидан ўлдирилган, унинг сабаблари ҳозирча номаълум.

Президентликка номзоднинг суиқасддан сўнг иштирок этган биринчи тадбири Висконсин штатининг Милуоки шаҳрида бўлиб ўтган Республикачилар миллий қурултойи бўлди. Сиёсатчи у ерга боғланган қулоғи билан келган.