Россиянинг кўплаб вилоятлари мамлакатда ишчи кучи танқислигига қарамай, меҳнат муҳожирлари ишига чекловлар қўйишда давом этмоқда. Камчатка ҳукумати Россияга ишлаш учун келган хорижликларга таксида ишлашни тақиқлади.

“Мен чет эл фуқароларига таксида ишлашни тақиқлашга қарор қилдим. Қарор жорий йилнинг баҳори охиригача кучга киради ва Камчаткада патент бўйича ишлаётган хорижликларга нисбатан қўлланилади”, — деди Камчатка ўлкаси губернатори Владимир Солодов ўзининг телеграм-каналида.

У ўз қарорини “минтақада турли жиноятлар содир этаётган” ноқонуний муҳожирлар одатда таксиларда ишлаши билан изоҳлади. “Кўрилган чора-тадбирлар ва умуман миграция сиёсатининг қатъийлаштирилиши йўловчи ташиш бозорини хавфсизроқ қилишига ишонаман”, — дея қўшимча қилди Солодов.

Камчатка ўлкаси Россиянинг мигрантлар меҳнатига чекловлар киритилган ўн иккинчи ҳудудига айланди. Бунгача Челябинск, Магадан, Калининград, Тула, Новосибирск, Тюмен, Калуга ва Новгород вилоятларида, шунингдек, Ханти-Манси автоном округи – Угра, Якутия ва Қримда айрим соҳаларда хорижликларни ишга олиш тақиқлангани эълон қилинган эди.