Марказий банк онлайн кредит бериш бўйича талабларни кучайтирмоқда. Бу ҳақда Марказий банк раиси Мамаризо Нурмуратов 25 июль куни бўлиб ўтган матбуот анжуманида маълум қилди, дея хабар берди «Spot». 

“Онлайн кредит олиш масаласидаги фирибгарлик бизни жуда ўйлантираётган масала. Нафақат бизни, балки бутун дунё марказий банкларини ўйлантираётган масаладир. Биз қонунчиликка бир қатор ўзгартиришлар киритдик. Июль ойида бу ўзгаришлар Сенатда қабул қилинди”, — дейди Мамаризо Нурмуратов.

Нурмуратов бу бўйича банкларга минимал талаблар белгиланаётганини таъкидлади. Бу фуқаролар томонидан кредит расмийлаштирилишини чеклаб қўйиш амалиёти бўлиб, тизим орқали банкларнинг кредит бериш имконияти чекланади.

Бундан ташқари, кредит олиш жараёнида ҳақиқатдан ҳам кредитни шахснинг ўзи олишини текшириш амалиётини жорий этиш режалаштирилмоқда.

Жараён икки усулда амалга оширилади. Биринчи усулда бевосита кредит олмоқчи бўлаётган шахс хабардор қилиш орқали, иккинчи усулда кредит олиш жараёнида ҳақиқатдан ҳам фуқаро томонидан олинаётганига маълум воситалар билан розилик бериш тизими орқали назорат қилиш механизми ишлаб чиқилмоқда.

“Бундан ташқари, бугун ҳам бу масала муҳокама қилинди, бу доимо биз муҳокама қиладиган масалалардан бири — банкларга маълум жиҳатдан шубҳали туюлган операцияларни тўхтатиб қўйиш масаласи. Бу ерда нафақат онлайн кредит олиш, балки [фуқаролар ўртасидаги] пул ўтказмалари бўйича ҳам операцияларни тўхтатиб қўйиш [масаласи] айтилмоқда. Бунда икки томонлама таъсири бор. Бир томондан эртага [бу мавзу] муҳокама қилиниши мумкин „банкнинг нима ҳаққи бор, менинг пулимга хўжайинлик қилишига“ деб. Иккинчи томондан, маълум жиҳатдан, биз ҳимоя қилаётганимизни тушунтиришимиз қийин бўлади. Яна тўловларнинг ўтишида кечикиш бўлади — онлайн деган принципни маълум жиҳатдан бузган бўламиз”, — деди у.

Унинг таъкидлашича, онлайн кредит билан шуғулланувчи банкларда ҳар куни 10−15 мингта операциялар амалга оширилади. Бу энг тез ўсувчи банк маҳсулотларидан бирининг таҳлили. Бу бўйича рақамли банклар билан ҳам иш олиб борилмоқда.

“Кредит олишнинг қайта тасдиғини ўрганиш бўйича, менимча, яқин орада бизнинг [Марказий банк] кўрсатмамиз — қандай минимал талаблар қўяётганимиз тижорат банкларига етказилади. Бу доимо бизни ўйлантирадиган жуда муҳим масала. Биз бу бўйича ишлаяпмиз”, — дея хулоса қилди регулятор раиси.