Шоира Маҳлиё Аҳророва хонанда Авазбек Олимов устидан судга даъво аризаси киритди.

Тошкент шаҳар судидан таҳририятга маълум қилинишича, даъвогар Маҳлиё Аҳророва жавобгар Авазбек Олимовга нисбатан муаллифлик ҳуқуқлари бузилганлиги учун товон пули ва маънавий зарар ундириш ҳақидаги талаб билан 2024 йил 2 февралда фуқаролик ишлари бўйича Учтепа туманлараро судига даъво аризаси киритган.

Маҳлиё Аҳророва даъво аризасида хонанда Авазбек Олимов унинг “Гўзал ёрим” шеърини ўзгартириб, “Севар ёрим” номи остида муаллифнинг рухсатисиз ижро этиб келганлигини, “Гўзал ёрим” шеъри 2009 йилда ёзилганлиги ва “Сўзи гавҳарим” китобида чоп этилганлиги, хонанда уни 2015 йилдан ҳозирги кунга қадар мунтазам равишда номини ўзгартириб, турли давраларда ижро этиб келганлигини таъкидлаган.

Иш ҳужжатларига кўра, айни шу ҳолат юзасидан Жиноят ишлари бўйича Учтепа туман судининг 2023 йил 4 декабрь кунги қарори билан Авазбек Олимов маъмурий жавобгарликка тортилган.

Шоира хонандадан ўзининг фойдасига 200 млн сўм маънавий зарар ҳамда 340 млн сўм товон пули ундириб беришни, хонандага “Севар ёрим” қўшиғини ижро этишни, барча теле ва радиоканалларга мазкур қўшиқни эфирга узатишни тақиқлашни сўраган.

Дастлаб суд мажлиси 2024 йил 14 март кунига белгиланган. Аммо хонанда (ёки унинг ишончли вакили) суд мажлисига келмаганлиги сабабли ишни кўриш 28 март ва 8 апрель кунларига қолдирилган. 8 апрель кунидаги суд мажлисида жавобгарнинг адвокати иштирок этиб, иш ҳужжатлари билан танишиш учун суд мажлисини бошқа кунга қолдириш ҳақида илтимоснома киритган.

23 апрель куни навбатдаги суд мажлиси бўлиб ўтган ва тарафлар тингланган. Навбатдаги суд мажлиси 7 май куни давом эттирилиши белгиланган.