Давлат котиби Энтони Блинкен, агар Россияга икки мақсадли маҳсулотлар етказиб беришни тўхтатмаса, Қўшма Штатлар Хитойга нисбатан чеклов чораларини киритишга тайёрлигини маълум қилди. Унинг қайд этишича, бу мавзу Пекинда Хитой раиси Си Цзинпин ва ташқи ишлар вазири Ван И билан музокараларда муҳокама қилинган.

“Бугунги муҳокамалар чоғида мен ХХР томонидан Россиянинг Украинага қарши тажовузкорлигини кучайтирувчи компонентлар етказиб берилишидан жиддий хавотирларимизни такрорладим. Агар Хитой томонидан ҳеч қандай чора кўрилмаса, биз чора кўришга тўлиқ тайёрмиз”, деди Блинкен матбуот анжуманида. 

Унинг эслатишича, АҚШ аввалроқ Хитой компанияларига қарши санкциялар киритган. Анжуман АҚШ Давлат департаментининг YouTube’даги каналида трансляция қилинди.

АҚШ котибининг фикрича, Хитой Россияга ёрдам беришда давом этар экан, Ғарб давлатлари билан яхши муносабатларга интила олмайди.

Антони Блинкеннинг Хитойга ташрифи арафасида The Wall Street Journal мақола эълон қилди, унда Россия-Украина ҳарбий можароси бошланганидан кейин Хитой Федерацияга электрон схемалар, самолёт қисмлари, автомобиллар ва станоклар етказиб берувчи асосий давлатга айлангани айтилди.

Хитой банклари Россияга тижорат экспорти бўйича асосий воситачилар сифатида номланди. Нашр манбаларининг иддао қилишича, АҚШ уларга қарши санкциялар жорий этишга ҳозирлик кўрмоқда. 

Хитой Ташқи ишлар вазирлиги нашрга изоҳ берар экан, ХХР бошқа давлатлар билан тенг ҳуқуқлилик ва ўзаро манфаатлар асосида нормал савдо-иқтисодий фаолият юритиш ҳуқуқига эга эканлигини таъкидлади. Блинкен билан учрашувда Ван Йи АҚШни Хитой суверенитети ва хавфсизлигига оид қизил чизиқларни кесиб ўтишдан огоҳлантирди.