![Detail image](https://dnews.uz/img/assets_front/img/news/uzreport/uzreport669e3c801483f.jpeg)
«Андижон» клуби ўз тарихида илк бор Россия Премер-лигасига футболчи трансфер қилди.
Ўзбекистон U-20 жамоаси билан Осиё чемпиони бўлган ва кичик мундиалда қатнашган яримҳимоячи Шерзод Асанов Россиянинг юқори дивизионига чиққан «Акрон» клубига ўтди.
«Трансфер ойнаси очилган маҳалда селекция ишлари янада жиддий тус олган. Маълумки, «Андижон» таркибида кўплаб иқтидорли, келажаги порлоқ футболчилар талайгина. Улар жамоамиз сафида тўп суриш орқали ўзларини кўрсатишмоқда ва кўплаб скаутларнинг эътиборини тортмоқда.
Қолаверса, жамоамизда трансфер сиёсати тўғри йўналишда олиб борилаётгани ўз самарасини бермоқда.
Жумладан, 21 ёшли яримҳимоячимиз, ёшлар жамоаси аъзоси Шерзод Эсановга Россиянинг «Акрон» жамоасидан жиддий таклиф тушди. Натижада иккала клуб томонидан олиб борилган музокаралардан сўнг Эсанов «Акрон» жамоасига трансфер қилинди.
Шуни алоҳида таъкидлаш жоизки, «Андижон» клубидан илк бор Россия Премер-лигасига ўйинчи трансфер қилиниши ҳамда шу йилнинг ўзида жамоамиздан иккинчи футболчининг (биринчи трансфер Рубин Ҳебай) хориж клубига сотилиши амалга оширилаётган тизимли ишларнинг маҳсулидир.
Шерзод «Андижон» сафига 2022 йили қишда қўшилган бўлиб, қисқа фурсат ичида ўз иқтидорини намойиш қила олди. Ўша йилги мавсумда Эсанов «Андижон» сафида чемпионат ва кубок баҳсларида ҳаммаси бўлиб 18 та ўйинда майдонга тушиб, 3 та гол урди. Ўтган йилги мавсумни ҳам жамоамиз билан бирга бошлади ва 5 та ўйинда қатнашди. Иккинчи даврада эса «Олимпик» клубига ижарага берилди. Бу мавсум аввалида Эсанов яна «Андижон»га қайтди. Мавсумнинг биринчи қисмида у чемпионат ва кубокда ҳаммаси бўлиб 15 та беллашувда иштирок этиб, 2 та гол муаллифига айланди ҳамда мухлисларнинг меҳрини қозонди.
Шерзод бугун кечки пайт Тошкент-Москва йўналишида жўнаб кетди. Фаолиятида илк бор легионерга айланган футболчимизни янги жамоасида катта қизиқиш билан кутишмоқда.
Унинг янги клуби Толяттининг «Акрон» клуби илк бор Россия Премер-лигасида иштирок этмоқда. Эсановга «Андижон»даги фаолияти учун миннатдорчилик билдирамиз ва унга янги клубида муваффақият тилаймиз», — деб ёзади клуб матбуот хизмати.