1 майдан бошлаб Қозоғистон аэропортларида хавфсизлик чоралари кучайтирилди. Бу ҳақда мамлакат Транспорт вазирлигининг Фуқаро авиацияси қўмитаси хабар берди.

Билдирилишича, мамлакатнинг барча аэропортларида, вокзал, автотураргоҳлар ва йўловчи терминаллари яқинидаги ҳудудларда хавфсизликни кучайтириш бўйича қўшимча чора-тадбирлар йўлга қўйилган. 

Тақиқланган нарсаларни олиб ўтишнинг олдини олиш учун йўловчилар терминалига киришда биринчи скрининг линияси жорий этилган. 

Шу сабабли йўловчилардан рейсларга рўйхатдан ўтиш учун аэропортларга эртароқ келишлари сўралган. 

"Янги тартиб фуқаро авиацияси ҳаво транспорти инфратузилмасининг авиация хавфсизлиги ҳолатини профилактика қилиш ва баҳолаш билан боғлиқ", дейилади хабарда.