Фармацевтика тармоғини ривожлантириш агентлиги ахборот хизмати раҳбари Қизлархон Бегматованинг маълум қилишича, бугун, 30 декабрдан бошлаб Ҳиндистоннинг Marion Biotech компанияси томонидан ишлаб чиқарилган ва Ўзбекистонда рўйхатдан ўтказилган барча турдаги дори воситаларининг савдоси вақтинчалик тўхтатилди.

"Marion Biotech" компанияси томонидан ишлаб чиқарилган "Док-1 Макс" дори воситаси таркибида қўшимча моддалар аниқлангани боис, ҳозирда ишлаб чиқарувчининг бошқа маҳсулотлари ҳам чуқур лаборатор текширувлардан ўтказилмоқда.

Шунингдек, брифинг давомида фуқаролар хонадонларида сақлаётган ушбу дори воситалари ҳақида агентликка хабар қилишга чақирилди.

"Ҳурматли юртдошлар, агар сиз ҳам ушбу дори воситасини сотиб олган бўлсангиз, ҳозирда бу препарат уйингизда сақланаётган бўлса, уни дарҳол қўлламасликни ва 71 203- 27- 77 телефон рақамига қўнғироқ қилишингизни сўраймиз", - дейди агентлик ахборот хизмати раҳбари.

Эслатиб ўтамиз, Ҳиндистон ҳукумати Marion Biotech компаниясига қарши суриштирув бошлаган.

Суриштирув Уттар-Прадеш штатидаги наркотикларни лицензиялаш ва назорат қилиш бошқармаси томонидан олиб борилмоқда.