Тошкентдаги III Халқаро инвестиция форуми якунлари бўйича умумий қиймати 26,6 миллиард доллар бўлган келишувлар имзоланди. Бу ҳақда Инвестициялар, саноат ва савдо вазирлиги Матбуот хизмати хабар бермоқда.

Хусусан қуйидаги йирик инвестиция лойиҳаларини амалга ошириш бўйича келишувларга эришилди:

— "Data Volt” компанияси (Саудия Арабистони) билан ҳамкорликда “Янги Тошкент”да шаҳар инфратузилмасини қуриш ($1 млрд.) ва яшил технологияларга асосланган “маълумотлар марказларини” қуриш ($3 млрд);
— “Acwa Power” компанияси (Саудия Арабистони) билан Қорақалпоғистон Республикасида қуввати 5 ГВт шамол электр станциясини ҳамда қуввати 2 ГВт бўлган электр энергиясини сақлаш қурилмаларини қуриш ($6,2 млрд);
— “Amea Power”” компанияси (БАА) билан Қорақалпоғистонда қуввати 1000 МВт бўлган шамол электр станциясини қуриш ($1,1 млрд);
— “Saudi Tabrid” компанияси билан Нукус, Фарғона ва Қувасой шаҳарларида иссиқлик тизимини модернизация қилиш ($750 млн);

— “Nil Shugar” компанияси (Миср) билан Жиззах вилоятида қанд лавлаги етиштириш ва шакар ишлаб чиқариш ($500 млн);
— “Shaynxay Knud Interneshnl” компанияси (Хитой) билан Наманган вилоятида текстил ва тўқимачилик маҳсулотлари ишлаб чиқариш ($205 млн);
— “Vilmar Interneshnl” компанияси (Сингапур) билан Тошкент вилоятида озиқ-овқат маҳсулотлари ва чорва учун озуқа ишлаб чиқариш ($200 млн).

Бундан ташқари, форумда дунёнинг бир қатор йирик компаниялари ҳисобланган “Oraskom Investment” (Миср), “Bonafarm Grup” (Венгрия), "Sayar" (АҚШ), “Goldvind", "Sinoma" (Хитой), “Sam Yapi” (Туркия), “Pasha Development” (Озарбайжон) “Laselsberger” (Австрия), “Petrosat Chexelsoton" (Эрон) каби компаниялар билан қиймати $6,6 млрд тенг янги инвестисия лойиҳаларни амалга ошириш бўйича келишувларга эришилди.

Форумда 93 мамлакатдан 2,5 мингдан ортиқ делегат қатнашди. Тадбирнинг энг муҳим воқеаларидан бири Ўзбекистон ва Қирғизистон бош вазирлари иштирокида минтақавий энергетика лойиҳаларининг (Қамбарота ГЭС-1 ва Ёвон ГEСини қуриш) хорижий инвесторларга тақдимоти бўлиб ўтди.