ТОШКЕНТ, 27 окт — Sputnik. “Ўзбекнефтгаз” ва “ТНГ-Групп” компанияси ҳамкорликда иш олиб бориш ва ўзаро манфаатли ҳамда истиқболли лойиҳаларни қамраб олувчи “Йўл харитаси” ишлаб чиқишга келишиб олди.

“Ўзбекнефтгаз” Бошқарув раиси Меҳриддин Абдуллаев “ТНГ-Групп” компаниясининг Бош директор ўринбосари Фарит Васильев бошчилигидаги делегация аъзолари билан учрашди.

Унда геофизика хизматлари, қудуқларнинг таъмирланиши ҳамда 2D ва 3D услубидаги сейсмо-қидирув масалалари, шунингдек, сейсмик маълумотларни қайта ишлаш ва ўрганишда замонавий технологиялардан фойдаланиш бўйича тажриба алмашиш ҳамда ўзаро ҳамкорлик масаласи муҳокама қилинди.

Музокара чоғида томонлар икки компания ўртасида мутахассисларнинг ўзаро амалиёт олиб боришларини йўлга қўйиш, уларнинг билим ва кўникмаларини ошириш бўйича келишиб олишди.

Фарит Васильев ўз сўзида замонавий технологиялар ва ускуналар ёрдамида 2023 йилда “Ўзбекнефтгаз” томонидан бурғилаш, қазиб чиқариш бўйича янги натижаларга эришишига кўмаклашишини маълум қилди.

Маълумот учун, “ТНГ-Групп” компанияси нафақат МДҲ мамлакатлари балки дунёнинг етакчи нефт конларига хизмат кўрсатувчиларидан бири саналади.

“ТНГ-Групп” компаниясининг “TNG LOGGING ASIA” қўшма корхонаси 2018 йилдан буён Ўзбекистон ҳудудида фаолият юритиб келаётган кўплаб маҳаллий ва хорижий корхоналар билан ҳамкорлик қилиб келмоқда.

Эслатиб ўтамиз, Россиянинг "Татнефть" компанияси ҳам ўзбекистонлик ҳамкорлар билан фаол ҳамкорлик қилиб келмоқда. Аввалроқ компания республикада ёқилғи қуйиш тармоқларини ривожлантириш лойиҳаларини амалга оширмоқда ва нефть қазиб олиш ва уни қайта ишлашда иштирок этиш ниятида эканлигини маълум қилган эди.