O‘zbekistondagi 14ta OTM “QS Asia University Rankings” reytingida Top-1000talikka kiritildi. Bu haqda Oliy ta’lim, fan va innovatsiyalar vazirligi matbuot xizmati xabar berdi.
Malayziyaning Kuala-Lumpur shahrida o‘tkazilayotgan “QS Higher Education Summit Asia Pacific 2023” doirasida QS reyting tashkiloti Osiyo universitetlarining 2024-yil uchun reyting (QS Asia University Rankings 2024) natijalarini e’lon qildi.
Mazkur reytingga mamlakatning 6ta hududidan 14ta OTM kiritilib, shundan 6tasi birinchi marotaba top-1000talikdan o‘rin egalladi. Bular quyidagilar:
- Toshkent davlat iqtisodiyot universiteti;
- Toshkent axborot texnologiyalari universiteti;
- Jizzax politexnika instituti;
- Namangan muhandislik-texnologiya instituti;
- Toshkent davlat sharqshunoslik universiteti;
- Farg‘ona politexnika instituti.
Joriy yilda xalqaro tan olinganlik darajasi, ilmiy-tadqiqotlar rivoji, ta’lim sifati, xalqaro hamkorlik, akademik mobillik sohalari bo‘yicha Osiyo oliygohlari reytingida 25ta davlatdan 856ta OTM ishtirok etgan.
Bunda O‘zbekistonning 3ta — O‘zbekiston milliy universiteti, Toshkent irrigatsiya va qishloq xo‘jaligini mexanizatsiyalash muhandislari instituti" milliy tadqiqot universiteti hamda Toshkent davlat iqtisodiyot universiteti “Akademik reputatsiya” indikatori bo‘yicha “TOP-200” oliygohlar qatoridan o‘rin egalladi.
O‘zMU “Akademik reputatsiya” bo‘yicha nisbatan yetakchi bo‘lib, 135-o‘rinda qayd etildi. Mazkur indikator bo‘yicha 7ta OTM o‘z o‘rnini yaxshilagan.
“Ish beruvchilar o‘rtasidagi reputatsiya” indikatori bo‘yicha TIQXMMI MTU 208-o‘rin, “Professor-o‘qituvchilar va talabalar nisbati” indikatori bo‘yicha 124-o‘rinni egalladi.
2022-yili mazkur “QS Asia University Rankings” reytingigaga mamlakatdagi 8ta OTM kiritilgandi.