![Detail image](https://dnews.uz/img/assets_front/img/news/sof/sof6402e064729fe.jpg)
Американинг Twitter компаниясининг даромади 2022 йил декабрь ойида реклама берувчилар ҳамкорлик қилишдан бош тортгач, тахминан 40 фоизга камайди. Бу ҳақда манбаларга таяниб, The Wall Street Journal (WSJ) хабар бермоқда.
Таъкидланишича, ўтган йилнинг шу давридаги кўрсаткичларга нисбатан даромадлар ва соф фойданинг пасайиши Twitter раҳбариятидаги инвесторларга маълум бўлиб улгурган. 2022 йил октябрь ойида Tesla ва SpaceX раҳбари Илон Маск компанияни сотиб олгач, Twitter хусусий компаниялар тоифасига ўтди ва энди молиявий ҳисоботларни нашр этмайди.
Ноябрь ойида Financial Times газетаси кўплаб йирик реклама берувчилар бизнесмен Илон Маскнинг ўзи сотиб олган компанияга нисбатан хатти-ҳаракатлари олдиндан айтиб бўлмайдиганлиги сабабли Twitter'даги рекламаларни вақтинчалик тўхтатиб қўйганликларини эълон қилгани ҳақида хабар берган эди.
Январь ойида Twitter ижтимоий тармоғи раҳбарияти брендлар платформадан чиқиши фонида компанияларга бепул реклама таклиф қилаётгани хабар қилинган эди. WSJ маълумотларига кўра, компания реклама берувчиларга 250 000 долларгача бўлган реклама харажатларини қоплашни таклиф қила бошлади.