Қозоғистоннинг Биринчи Президенти Нурсултон Назарбоевнинг куёви Тимур Кулибоев, Қайрат Боранбаев (Дариға Назарбоеванинг қудаси) ва тадбиркор Александр Машкевич Молдова Уюшган жиноятчилик ва алоҳида муҳим ишларга қарши кураш прокуратурасига сўроққа чақирилди. Бу ҳақда чақирув қоғозлари нусхаларига таяниб, Orda.kz ёзмоқда.

Ҳужжатларда айтилишича, Қулибоев, Боранбоев ва Машкевич 2022 йилнинг февраль ойида шантаж бўйича очилган жиноий иш доирасида сўроқ қилиш учун прокуратурага келиши керак бўлган. Билдиришномалар 2021 йил декабрь ойида чиқарилган. Улар сўроққа келган-келмагани номаълум. Иш тафсилотлари ошкор этилмаган.

“Сиз адвокат ҳамроҳлигида прокуратурага келиб, айбингизга иқрор бўлишингиз ва гумонланувчи сифатида сўроқ қилинишингиз керак. Кўриниш беришингиз мажбурийдир”, дейилади прокурор Денис Пояте имзолаган учта чақирув қоғозида.

Очиқ манбалардан олинган маълумотларга қараганда, Молдова прокуратурасида шундай исмли прокурор ҳақиқатан ҳам ишлайди.

Қулибоев ва Боранбаев Молдова прокуратурасига сўроққа чақирилаётгани ҳақидаги маълумот 2022 йил февраль ойи ўрталарида интернетда тарқалганди. Ўшанда тадбиркорлар “катта миқдорда товламачилик”да гумон қилинаётгани хабар қилинди, деб ёзади нашр.

Назарбоевнинг сиёсий интиҳоси

2019 йил март ойида Президент лавозимини Қосим-Жомарт Тўқаевга топшириб, Элбоши рутбасини олган ва Хавфсизлик Кенгашини бошқариб келаётган Нурсултон Назарбоев Қозоғистондаги намойишлар авж олиши фонида Хавфсизлик Кенгаши бошқарувини ҳам қўш қўллаб Президент Тўқаевга топширди. Ўшандан буён унинг қаердалиги шубҳа остида. Гарчи Назарбоевнинг атрофидагилар 8 январдан бошлаб тилга кириб, унинг мамлакатда бўлиб турганини айтаётган бўлса-да, собиқ Президент ҳозиргача бир-икки видеомурожаатлардан ташқари, ҳеч қаерда кўриниш бермади. Ҳатто, тўнғич қизи – депутат Дариға Назарбоева ҳам 11-12 январь ва 1-2 февраль кунлари бўлиб ўтган Парламент ялпи мажлисида иштирок этмаган. Сўнгги маълумотларга кўра, у маошсиз меҳнат таътилида. Бу орада эса у “Нур Отан” сиёсий кенгаши аъзолигидан кетди.

Назарбоев кўриниш бермаётган бир вақтда эса унинг ҳатто, соғлиғи ҳақида миш-мишлар тарқала бошлади. Намойишларда эса собиқ Президентнинг Олма-отадаги саройи ёқиб юборилди, ҳайкали қўпориб ташланди. 

Аввалроқ, Назарбоевнинг куёвлари: Алиянинг (кенжа қизи) турмуш ўртоғи Димаш Досанов “Казтрансойл” АЖ раҳбаригидан, Дариғанинг (тўнғич қизи) турмуш ўртоғи Кайрат Шарипбаев “QazaqGaz” миллий компанияси АЖ раҳбарлигидан кетганди. 17 январь куни ўртанча қиз Динаранинг турмуш ўртоғи Тимур Кулибаев “Атамекен” миллий тадбиркорлар палатаси президиуми раиси лавозимини тарк этди.

28 январь куни Назарбоев “Нур Отан” партияси расилигини ҳам Президент Қосим-Жомарт Тўқаевга топширди. 

2 февраль куни Қозоғистон парламенти мамлакатнинг Биринчи Президенти Нурсултон Назарбоевнинг Хавфсизлик кенгаши ва Қозоғистон халқи ассамблеясига умрбод раислик қилишини бекор қилувчи қонунни қабул қилди.