Шунингдек, қонунга хилоф равишда майнинг фаолиятини амалга оширганлик учун ҳам жавобгарлик белгиланади.

Фото: Kun.uz

Олий Мажлис Қонунчилик палатаси мажлисида бир қатор қонун лойиҳалари муҳокама қилинди.

Жумладан, «Ўзбекистон Республикасининг Жиноят, Жиноят-процессуал кодексларига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида»ги қонун лойиҳаси иккинчи ўқишда кўриб чиқилди. 

Депутат Дониёр Ғаниев сўзларига кўра, қонун билан мобил қурилманинг IMEI кодини ўзгартирганлик учун маъмурий жавобгарлик белгиланади.

«Ушбу қонун лойиҳаси билан Маъмурий жавобгарлик тўғрисидаги кодексга мобил қурилманинг халқаро, ўзига хос идентификация кодини ёки абонент қурилмасининг идентификациялаш модулини қонунчилик ҳужжатларига зид равишда ўзгартирганлик ёки нусхасини ясаганлик, крипто-активлар айланмаси соҳасидаги қонунчилик ҳужжатларини бузганлик ва қонунга хилоф равишда майнинг фаолиятини амалга оширганлик учун маъмурий жавобгарликни назарда тутувчи қўшимчалар киритилмоқда», деди у.  

Депутатнинг таъкидлашича, шунингдек, Жиноят кодексининг 165-моддасига товламачилик жинояти билан боғлиқ аниқ нормалар киритилади.

Муҳокамалардан сўнг, қонун лойиҳаси учинчи ўқишда қабул қилинди.