Silk Avia aviakompaniyasi va Humo to‘lov tizimidagi 100 foiz davlat ulushi ommaviy savdolarga chiqariladi. Bundan tashqari, «O‘zbekneftgaz» AJ tarkibiga kiruvchi 4 ta, «O‘zavtosanoat» AJ tarkibiga kiruvchi 42 ta, «O‘zbekiston temiryo‘llari» AJ tarkibiga kiruvchi 9 ta tashkilotdagi davlat ulushlari xususiylashtiriladi.

Foto: Andrey Kudryashov

«Iqtisodiyotda davlat ishtirokini qisqartirishning qo‘shimcha chora-tadbirlari to‘g‘risida»gi prezident qarori qabul qilindi.

Qaror bilan quyidagilar tasdiqlandi:

• ommaviy savdolarga chiqariladigan aksiya paketlari (ulushlari) ro‘yxati;
• ommaviy savdolarga chiqariladigan davlat va davlat ishtirokidagi korxonalarning ko‘chmas mulk obektlari ro‘yxati;
• mahalliy fond bozorida aksiyalarining birlamchi (IPO) yoki ikkilamchi (SPO) ommaviy taklifi o‘tkaziladigan korxonalar ro‘yxati.

Davlat aktivlari 3 oy davomida sotilmaganda (Toshkent shahri va viloyat markazi bundan mustasno) ularning qiymati 10 foizgacha bosqichma-bosqich pasaytiriladi.

Joriy yilgacha ijara shartnomalari asosida ijaraga olganiga kamida 5 yil bo‘lgan va majburiyatlarni bajargan tadbirkorlarga xususiylashtirish dasturlariga kirgan davlat mulkini baholangan qiymatda to‘g‘ridan to‘g‘ri sotib olish huquqi beriladi.

2024 yil 1 iyuldan davlat ishtirokidagi yirik korxonalarda:

• korporativ boshqaruv tizimini takomillashtirish, jumladan boshqaruv organlari faoliyati samaradorligini yanada oshirish uchun kuzatuv kengashiga bo‘ysunadigan korporativ kotibiyat tashkil etiladi;
• korporativ boshqaruvning yangilangan qoidalari va axloq kodeksi joriy etiladi;
• kuzatuv kengashining bayonnomalarini masofadan axborot-kommunikatsiya texnologiyalaridan foydalangan holda elektron ovoz berish byulletenlari orqali rasmiylashtirish imkoniyati yaratiladi.

«O‘zbekneftgaz» AJ tarkibiga kiruvchi 4 ta, «O‘zavtosanoat» AJ tarkibiga kiruvchi 42 ta, «O‘zbekiston temiryo‘llari» AJ tarkibiga kiruvchi 9 ta tashkilotdagi davlat ulushlari xususiylashtiriladi.

Shuningdek, Silk Avia aviakompaniyasi, «Milliy banklararo protsessing markazi» (Humo to‘lov tizimi) va Xumson sanatoriyasidagi 100 foiz davlat ulushi ham ommaviy savdolarga chiqariladi.

Bundan tashqari, 12 ta yirik korxonadagi davlat ulushlarining mahalliy fond bozorida birlamchi (IPO) va ikkilamchi (SPO) ommaviy taklifi o‘tkaziladi.

Aksiyalari fond birjasiga chiqarilishi kutilayotgan korxonalar va aksiyalar ro‘yxati:

Qarorda umumiy hisobda 247 ta korxona va 1028 ta ko‘chmas mulk obektidagi davlat aksiya paketlari ommaviy savdolarga chiqarilishi ko‘zda tutilgan.