Самарқанд давлат университети профессор-ўқитувчилари, талабалари Президентимиз томонидан эълон қилинган “Яшил макон” дастури доирасида биргина 2022 йилда олис Қўшработ туманида 5 гектар майдонга 1500 туп, Нуробод тумани даштида 12 гектар ерга 5000 туп мевали ниҳол экиб, боғ яратган эди.

Бугун ушбу дастурнинг давоми сифатида Жомбой туманида жойлашган СамДУ Агробиотехнологиялар ва озиқ-овқат хавфсизлиги институтида 1.02 гектар ерга 2500 тупдан ортиқ мевали ва манзарали кўчатлар ўтқазилди.

Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов ташаббуси билан ташкил этилаётган мазкур боғлар илм-фанга асосланган бўлиб, аҳоли ўртасида экологик саводхонликни шакллантириш, табиатга дахлдорлик туйғусини уйғотишга қаратилган.


- Бугун нафақат юртимизда, балки бутун дунёда экологик муаммолар кучаймоқда. Ҳавонинг ифлосланиши, сувнинг камайиши, озиқ-овқат танқсилиги, ер ва тупроқ унумдорлигини пасайиши кузатилмоқда, - дейди Рустам Холмуродов. – Бу каби муаммолар яшаш имкониятимизни қийинлаштириб, ҳаёт сифатини пасайтиради... Юртимизда олиб борилаётган кенг кўламли ислоҳотларнинг энг муҳим томонидан бири аҳоли турмуш фаровонлигини оширишдан иборат. Шунинг учун ҳам “Яшил макон” умуммиллий лойиҳаси ишлаб чиқилди. Президентимиз Шавкат Мирзиёев таъкидлаганидек: “Қадимдан аждодларимиз она табиат билан ҳамоҳанг бўлиб яшаганлар. Афсуски, бугунги кунда табиатга нисбатан истеъмолчилик кайфияти кучайиб бормоқда. Иқлим ўзгариши туфайли юзага келаётган турли муаммолардан бутун инсоният қаттиқ азият чекмоқда. Бундай ҳолат барчамиздан кечиктириб бўлмайдиган чора-тадбирларни амалга оширишни талаб этади”. Жойларда барпо этиладиган боғлар ҳавонинг тозалаши билан бирга ҳудуддаги озиқ-овқат хавфсизлиги масалаларини ҳам ҳал этишга ёрдам беради. Ҳар бир инсон битта дарахт кўкартирса ёки экологик маданиятга риоя қилса биз мақсадга эришган бўламиз. Шаҳар ва қишлоқларимизни экологик тоза ва яшаш учун барча имкониятлар мавжуд бўлган ҳудудга айлантириш барчамизнинг вазифамиздир…




- Самарқанд давлат университети Агробиотехнологиялар ва озиқ-овқат хавфсизлиги институтида боғ барпо этилиши назария ва амалиётни уйғунлаштирилган тарзда олиб боришга имконият яратади. Бундан ўқитувчи ва талабалар ҳам мамнун, - дейди институт директори, доцент Тошпўлат Ражабов. – Эндиликда йигит-қизларимиз амалиёт ва лаборатория машғулотларини институтимизда ўтказишади... Бугун ерга қадалган ниҳоллар келажакда улкан боғ бўлишига ишонаман…




Самарқанд давлат университети
Ахборот хизмати.