Туркияда тез-тез турли мавзуларда сўровлар ўтказилади, масалан, актёрларни ўзаро солиштириш, сериалга баҳо бериш ёки энг чиройли жуфтликни аниқлаш бўйича. «Иккинчи саҳифа» кўрсатуви журналистлари ташаббусига кўра «Show TV» мухбирлари билан ҳамкорликда ўтказилган сўров бу гал Туркиянинг энг гўзал жуфтлигига бағишланди.

Сўровнома онлайн эмас, балки Истанбул, Измир, Анқара ва Бурса кўчаларида ўтказилди. Журналистлар 18 ёшдан 65 ёшгача бўлган респондентларга савол билан мурожаат қилди. Шуни таъкидлаш керакки, респондентларга жуфтликлар рўйхати берилмаган, улар ўз хоҳиш-истакларига кўра жуфтлик номини маълум қилган.

Шунингдек, сўровномада нафақат актёрлар, балки мусиқачилар, театр ва жамоат арбоблари жуфтлиги ҳам тилга олинган.

Сўров натижалари ажабланарли бўлмади, 2020 йилгидек ғолиблар Фаҳрие Эвжан ва Бурак Ўзчивит бўлди, аммо иккинчи ўринни бошқа бир жуфтлик эгаллади. 2020 йил иккинчи ўринни рафиқаси билан Киванч Татлитуғ эгаллаган бўлса, бу мавсумда Керем Бурсин ва Ханда Эрчел ушбу ўринга муносиб деб топилди. Учинчи ўрин эса Неслиҳан Атагул ва Кадир Доғулуга насиб этди.

Бешинчи ва олтинчи ўринларга Дилек Пинар ва Таркан жуфтлиги ҳамда  телебошловчи Фотиҳ Портакал рафиқаси билан лойиқ кўрилди. Еттинчи ва саккизинчи ўринлардан Киванч Татлитуғ ҳамда турмуш ўртоғи, Бергузар Корел ва Ҳалит Эргенч жой олган.

Шуни таъкидлаш керакки, ушбу тадқиқотни тўлиқ объектив деб бўлмайди, чунки у фақат 4 шаҳар бўйлаб ўтказилган. Овоз бериш пайтидаги кутилмаган жавоб Адриана Лима ва турк ёзувчиси Метин Хара жуфтлиги бўлди, аммо улар анча олдин ажрашган.