Сурхондарё вилояти Бойсун туманида 51 туп дарахт ноқонуний кесиб кетилгани аниқланди. Бу ҳақда вилоят Экология ва атроф-муҳитни муҳофаза қилиш бошқармаси хабар берди.

Маълум қилинишича, Сурхондарё вилояти Экология ва атроф-муҳитни муҳофаза қилиш бошқармаси масъул инспекторлари ва Миллий гвардия ходимлари билан биргаликда дарахт кесувчиларга қарши тезкор рейд тадбирлари ўтказмоқда.

Шундай рейд тадбирлари давомида Бойсун давлат ўрмон хўжалиги Мачай ўрмон бўлими ходимларининг хизмат ваколатига совуққонлик билан ёндашиши, юклатилган масъулиятни суистеъмол қилиши натижасида Мачай ўрмон бўлимининг 5-айланма 17-кварталининг «Етимтол» ва «Алмали» массивларида мавжуд бўлган Зарафшон арча, Шумтол, Учқад , Заранг жами 51 та дарахт ноқонуний равишда таг қисми билан кесиб ташлангани аниқланган.

Оқибатда «Ўсимлик дунёсини муҳофаза қилиш ва ундан фойдаланиш тўғрисида»ги қонунинг 37-моддаси талаблари бузилиб, ўсимлик дунёсига 560 миллион 550 минг сўм миқдорда зарар етказилган.

Ушбу ҳолат юзасидан тўпланган ҳужжатлар ҳуқуқий баҳо бериш учун прокуратурага юборилган.