Тарих фанлари номзоди, таниқли тарихчи олима ва археолог Маргарита Филанович Тошкент шаҳар ҳокимлиги 2021 йилда пойтахтдаги машҳур Шоштепа ёдгорлигини таъмирлашни ваъда қилган бўлса-да, ишлар ҳали ҳам бошланмаганини айтганди. Маданий мерос агентлиги ҳолатга муносабат билдирди.

Қайд этилишича, Маданият вазирлиги ва Вазирлар Маҳкамасининг қарори билан Шоштепа археологик ёдгорлиги маданий мерос объектлари рўйхатига киритилган. Объектни консервация қилиш лойиҳаси Маданий мерос агентлигининг Илмий-эксперт кенгаши томонидан маъқулланган. Ушбу лойиҳа асосида археология ёдгорлигини консервация қилиш ишлари қурилиш компаниясининг тегишли лицензияси йўқлиги сабабли бошланмай қолган.

2021 йил 24 ноябрь куни Discover invest МЧЖ томонидан лицензия олиш учун Ягона интерактив давлат хизматлари портали орқали Туризм ва спорт вазирлиги ҳузуридаги Маданий мерос агентлигига мурожаат этилган. Бироқ корхона томонидан ҳужжатлар тўлиқ тақдим этилмагани сабабли агентлик томонидан 2 марта лицензия бериш рад этилган.

Шундан сўнг 2021 йил 30 декабрь куни Discover invest МЧЖ томонидан лицензия олиш учун такроран Ягона интерактив давлат хизматлари портали орқали Маданий мерос агентлигига ҳужжатлар тўплами келиб тушган. Ҳужжатлар тўлиқ тақдим этилгани сабабли Маданий мерос агентлиги томонидан 2021 йил 30 декабрь куни лицензия берилган.