![Detail image](https://dnews.uz/img/assets_front/img/news/daryo/daryo63959cf7832d1.jpg)
Сербия НАТО тинчликпарвар кучларидан БМТ Хавфсизлик Кенгаши резолюцияси қоидаларига мувофиқ Косовога серб ҳарбийлари ва полициясини жойлаштиришга рухсат беришни сўрамоқчи. Бу ҳақда Сербия президенти Александр Вучич Белграддаги матбуот анжуманида маълум қилди, унинг сўзларидан Reuters иқтибос келтирмоқда. Сербия президентининг баёноти Косово ҳукумати ва серблар ўртасидаги можаро билан боғлиқ бир қатор воқеалардан сўнг янгради.
Қисман тан олинган Косово шимолидаги йўлда юзлаб этник серблар баррикадалар ўрнатиб, Сербия йўналишидаги икки йирик чегара ўтказиш пункти орқали ҳаракатланишни тўхтатиб қўйган. Айни пайтда, «Ярине» назорат-ўтказиш пунктидаги Косово полицияси республикага киришни блоклаган. Лепосавичдаги (Косово шимолидаги шаҳар) баррикадаларга эса Европа Иттифоқи (EULEX) ва НАТО (KFOR) махсус миссияси кучлари келган.
Намойишчи сербларнинг AFP ахборот агентлигига айтишича, улар яқинда Косово полициясига уюштирилган ҳужумларга алоқадорликда гумонланган асли серб собиқ полициячининг ҳибсга олинишидан ғазабда. Маҳаллий матбуотнинг ёзишича, намойишчилар маҳбуснинг Косово пойтахти Приштинага юборилишига тўсқинлик қилмоқчи бўлган.
Александр Вучич Белграддаги матбуот анжуманида KFOR қўмондонига ҳарбий кучларни Косовога жойлаштириш бўйича сўров юбормоқчилигини маълум қилар экан, бу катта эҳтимол билан рад этилишини ҳам таъкидлади.
10 декабрь куни Косово серблар яшайдиган туманларида муддатидан олдин сайловлар қолдирилганини эълон қилган.
Косовода 120 мингга яқин серблар бор, қисман тан олинган республиканинг 1,8 миллионга яқин аҳолисининг катта қисми этник албанлар, дея эслатди AFP. Шу билан бирга, Шимолий Косовода (Сербия автоном вилояти) аҳолининг аксарияти серблардир.