Американинг Урушни тадқиқ қилиш институти (ISW) ўзининг кунлик шарҳида ёзишича, Россия қўшинлари Украина ҳудудига зарбалар беришда Эронда ишлаб чиқарилган учувчисиз учар қурилмалардан фаолроқ фойдалана бошлаган.

ISW Украина Қуролли кучлари Ҳаво кучлари қўмондонлигининг 10 декабрдаги хабарига эътибор қаратмоқда, унда Россия ҳарбийлари Херсон, Николаев ва Одесса вилоятларида Shahed-136 ва Shahed-131 дронларидан фойдаланиб, 15 та ҳужумни амалга оширгани ҳақида айтилади. Одессада 10 декабрь куни Россия энергетика объектларига ҳужум қилганидан кейин муҳим инфратузилма объектларидан бошқа барча истеъмолчилар чироқсиз қолди.

Шунингдек, ISW қайд этишича, Россия ҳарбийлари уч ҳафталик танаффусдан кейин, 7 декабрь куни Украина ҳудудига зарбалар бериш учун Эрон дронларидан фойдаланишни қайта бошлаган. Шундан бир неча кун аввалроқ NBC News телеканали Оқ уйдаги манбаларига таяниб, Россия ҳукумати дронлар эвазига Эронга «мисли кўрилмаган даражада» ҳарбий ва техник кўмак кўрсатаётгани ҳақида ёзганди.

ISW фикрича, Россия ҳарбийлари, катта эҳтимол билан, Эрондан дронларнинг янги партиясини олган ёки яқин кунларда уларнинг етказиб берилиши кутилмоқда.

Бундан ташқари, шарҳ муаллифлари Россия қўшинлари дронлардан фойдаланмаган уч ҳафта давомида уларни тўплаш билан шуғулланганини ҳам истисно қилмаяпти. Шунингдек, таъкидланишича, Эронда ишлаб чиқарилган дронларни қиш шароитида қўллаш учун уларни модификация қилиш ҳам талаб этилган.

Украина расмий шахслари Эронни Россияга Mohajer-6 ва Shahed-136 дронларини сотишда айбламоқда. Россия президентининг матбуот котиби Дмитрий Песков Кремль Украинада Эрон дронларидан фойдаланилаётганидан бехабар эканини айтганди. 5 ноябрь куни Эрон Россияга учар қурилмалар етказиб берилганини тан олган, бироқ «кам миқдорда» ва Украинада жанговар ҳаракатлар бошланишидан «бир неча ой аввал» юборилганини айтганди.