Pfizer Inc. ва BioNTech СЕ компаниялари коронавирусга қарши вакцинасининг омикрон штамми билан курашиш учун махсус ишлаб чиқилган янги версияси клиник синовларини бошлади. Бу ҳақда компаниялар баёнотига таяниб, Reuters хабар берди.

Агентлик маълумотларига кўра, компаниялар янги вакцинанинг ҳимоясини бустер доза ва вакцинанинг учта алоҳида дозаси кўринишида илгари эмланмаган одамларда синаб кўришни режалаштирмоқда. АҚШда ўтказиладиган синов жараёнида 18 ёшдан 65 ёшгача бўлган 1400 дан ортиқ одам иштирок этиши кутилмоқда.

«Ушбу вакцинанинг мақсади жиддий касалликдан ҳимоя қилишдир. Бугунги кунга келиб, бу вакциналар ўз вазифасини бажармоқда, жумладан, омикрондан ҳимоя қилмоқда», — деди Пенсильвания университети юқумли касалликлар бўйича мутахассис доктор Пол Оффит.

Компания расмийларининг таъкидлашича, 2022 йилда COVID-19 га қарши вакциналарининг тўрт миллиард дозасини ишлаб чиқариш режалаштирилмоқда, агар синовлар муваффақиятли ўтса, бу рақам янги вакцина дозаларини ҳам ўз ичига олади. Янги вакцинани синовдан ўтказиш давомида 615 киши ҳозирги Pfizer-BioNTech вакцинасининг икки дозасини, кейин эса омикронга қарши янги вакцинанинг бир ёки икки дозасини олади. Тадқиқотнинг вакцина олмаган 205 нафар иштирокчилари эса бирйўла омикронга қарши янги вакцинасининг учта дозасини олади.

Pfizer компаниясида таъкидланишича, асл вакцинанинг икки дозаси омикрондан ҳимояланиш учун етарли бўлмаслиги, касалхонага ётқизиш ва ўлимларнинг олдини олишда самараси паст бўлиши мумкин. Бироқ АҚШ Касалликларни назорат қилиш ва олдини олиш марказлари Pfizer/BioNTech вакцинаси каби мРНК вакцинасининг учинчи дозаси COVID-19 туфайли касалхонага ётқизишлардан 90 фоиз ҳимоя қилишини даъво қилмоқда.

Синовларда махсус ишлаб чиқилган вакцинанинг керак ёки йўлиги, шунингдек, унинг хавфсизлиги, чидамлилиги ва иммуногенлигини текшириш режалаштирилган. Компаниялар тажрибаларни якунлаш муддатини белгиламаган.

Аввалроқ АҚШнинг Moderna фармацевтик компанияси омикрон штаммига қарши вакцина синовларини яқин ҳафталарда бошлашини эълон қилганди. Ноябрь ойининг охирида Johnson & Johnson корпорацияси омикрон штаммига қарши вакцина яратишни бошлаганди.