"Uzbekistan Airports" ахборот хизмати маълум қилишича, Тошкент халқаро аэропортининг учиб кетиш терминалида йўловчиларга рейсга рўйхатдан ўтиш, божхона ва паспорт назорати, шунингдек, парвоз олдидан текширувлардан навбатсиз ўтиш имконини берувчи "Fast-track" хизмати ишга туширилди.
"Fast-track" хизматидан фойдаланиш учун йўловчи жўнаш терминалидаги маълумот бурчагига мурожаат қилиши керак. Тўлов амалга оширилганидан сўнг аэропорт ходими йўловчини махсус "коридор" бўйлаб "стерил" зонагача кузатиб боради ва у ердан йўловчи мустақил равишда бортга чиқади.
"Fast-track" хизматининг нархи — 170 минг сўм. Шунингдек, оила аъзолари билан учаётган йўловчилар учун "Оилавий" пакети мавжуд. Тўловни миллий валютада нақд пулда ёки пластик карта орқали амалга ошириш мумкин, дейилади хабарда.