Исроил ҳукумати бир овоздан Қатарнинг Al Jazeera телеканали фаолиятини тўхтатишга қарор қилди. Бу ҳақда Al Jazeera хабар берди 

“Бизнинг фармонларимиз кучга киради. Давлат хавфсизлигига путур етказаётган Al Jazeera‘нинг яхши мойланган провокацион машинасини тўхтатиш учун жуда кўп кераксиз қонуний тўсиқлар бўлди”, — деди Исроил алоқа вазири Шломо Кархи.

Вазир эндиликда Al Jazeera‘га Исроилда фаолият юритиш тақиқланиши, телекомпаниянинг жиҳозларини мусодара қилиш ҳақида буйруқ чиқариши мумкинлигини айтди.

“Ҳукумат бир овоздан қарор қилди: Исроилда Al Jazeera провокацион канали ёпилади”, — дейди Исроил бош вазири Бинямин Нетаняху.

Исроил разведка хизмати мамлакатдаги Al Jazeera бюросини ёпиш таклифини қўллаб-қувватлаган. 2023 йил ноябрида Исроилда Ливаннинг Al Mayadeen телеканалини фаолияти тақиқланган эди.