Ўзбекистон, Тошкент – Batafsil.uz. Япония халқаро ҳамкорлик агентлиги (JICA) Ўзбекистонга бозор иқтисодиётини ривожлантириш ва инклюзив жамият қуриш учун 246,5 миллион доллар юборади. Бу ҳақда мухбиримиз хабар бермоқда.

Агентлик сайтида айтилишича, 19 февраль куни Тошкентда Япония халқаро ҳамкорлик агентлиги (JICA) Ўзбекистон билан барқарор иқтисодиётни қўллаб-қувватлаш дастурини, шунингдек, ижтимоий ривожланиш дастурини молиялаштириш учун 37 миллиард иенагача (246,5 миллион доллар) кредит бериш тўғрисида кредит шартномасини имзолаган.

Кредит 30 йил муддатга, йилига 1,8% фоиз ставкаси бўйича 10 йиллик имтиёзли давр билан ажратилади.

Таъкидланишича, ушбу кредит Ўзбекистон ҳукуматининг бозор иқтисодиётига ўтиш билан боғлиқ давом этаётган иқтисодий ислоҳотларини қўллаб-қувватлайди, шунингдек, ижтимоий интеграция ва барқарорликни, шу жумладан иқтисодий шароитларнинг ўзгаришига мойил бўлган аҳолининг заиф қатламларини ҳимоя қилишни оширади.

Япония халқаро ҳамкорлик агентлиги таъкидлашича, хусусий секторнинг ўсиши учун бозор институтлари ва шароитларини мустаҳкамлаш, давлат корхоналарини бошқаришни такомиллаштириш, ижтимоий интеграция ва барқарорликни ошириш орқали ушбу кредит барқарор ривожланиш мақсадларига эришишга ёрдам беради: 1 (камбағалликни бартараф этиш), 5 (Гендер тенглиги) ва 8 (Муносиб меҳнат ва иқтисодий ўсиш).

Эслатиб ўтамизки, JICA аввалроқ Ўзбекистонда чорвачилик ва чарм саноатини ривожлантириш учун имтиёзли кредитларга 200 миллион доллар ажратган эди.