Ўзбекистон, Тошкент – Batafsil.uz. Амударё ва Сирдарё дарёларидаги сув сатҳи бу йил яхши бўлади. Бу ҳақда сув хўжалиги вазири билдирган. Бу тўғрисида мухбиримиз хабар бермоқда.

ЎзА маълумотларига кўра, сув хўжалиги вазири Шавкат Ҳамроев Олий Мажлисда депутатларнинг саволларига жавоб берган.

Вазирнинг таъкидлашича, бу йил ёғингарчилик натижасида Амударё ва Сирдарё дарёларида яхши сув сатҳи прогноз қилинмоқда. Ҳозирда ўтган йилги даража кутилмоқда. Сирдарёда 85-90%, Амударёда эса узоқ муддатли меъёрларнинг 90-95% бўлиши тахмин қилинмоқда.

"Ўтган йилга нисбатан бугунги кунда бизнинг сув омборларимизда 1,5 миллиард куб метр ортиқча сув шаклланган", - деди вазир.

Қўшнилар ўртасида сув муаммолари билан боғлиқ масалаларга оид гапирар экан, вазир минтақанинг бешта мамлакати сув истеъмол қилиш лимити тўғрисида келишиб олганлигини билдирган.

"Бизнинг сўнгги учрашувимиз Шимкентда бўлиб ўтди. У ерда сув омборларидаги сув ҳолати муҳокама қилинди",- деди Ҳамроев.

Шунингдек, унинг қўшимча қилишича, сўнгги йилларда очиқлик сиёсати натижасида қўшни давлатлар билан кўплаб масалалар, жумладан, сув масалалари бўйича яқин ҳамкорлик амалга оширилмоқда.

“Сув бизни душман қилиб эмас, дўст қилиб, манфаатли ҳамкорлик қилишга, Худонинг берган неъматидан самарали фойдаланишга ундайди” - деди Ҳамроев. 

Шунингдек, суғориш тизимини рақамли технологиялар асосида автоматлаштирилган бошқарувга ўтказиш мақсадида 2023 йилда 7,3 мингта "Ақлли сув" тизими, 2,5 мингта "Да1вер" тизими (ер ости сувлари даражасини ўлчаш учун) ва 271 та насос ўрнатилгани айтилган.

21 та йирик сув хўжалиги обектларини бошқариш жараёнлари автоматлаштирилган, сув ҳисобини юритиш ва сув истеъмолчиларининг ҳисобдорлигини амалга ошириш, шунингдек улар тўғрисидаги маълумотлар базасини шакллантиришга мўлжалланган ахборот тизими яратилган.