Ўзбекистон, Тошкент – Batafsil.uz. Ўзбекистон Энергетика вазирликнинг маълум қилишича, тарифлар ўзгаргани муносабати билан электроэнергиядан тежамли фойдаланиш натижасида 2024 йилнинг май ойида унинг етказиб берилиши камайган. Бу ҳақда мухбиримиз хабар бермоқда.
Ижтимоий тармоқларда “май ойида электр энергиясини ишлаб чиқариш ва табиий газ қазиб чиқариш камайди”, мазмунида эълон қилинган хабарга жавобан, Энергетика вазирлиги расман қуйидагиларни билдирган:
Унда айтилишича, жорий йилнинг май ойида 6,1 млрд кВт-соат электр энергияси ишлаб чиқарилган. Бу ўтган йилнинг мос давридагига нисбатан 337,9 млн кВт-соат ёки 5,8 фоиз кўп.
Шунингдек, республика истеъмолчиларига 5,0 млрд кВт-соат электр энергияси етказиб берилди. Мазкур кўрсаткич 2023-йилнинг шу давридагига нисбатан 297,1 млн кВт-соат ёки 5,7 фоиз кам.
Шу жумладан, иқтисодиёт тармоқларига — 3,7 млрд кВт-соат (92,2 млн кВт-соат кўп), аҳоли истеъмолчиларига — 1,2 млрд кВт-соат (393,7 млн кВт-соат кам) электр энергияси етказиб берилган. Яъни, аҳоли истеъмолчилари томонидан шунча ҳажмдаги электр энергияси тежалган.
Қолган электр энергияси станцияларнинг ўз эҳтиёжлари ва ишлаб чиқаришдаги эҳтиёж ҳамда электр энергиясини узатишдаги сарф учун ишлатилган ва ортиқча ишлаб чиқарилган мазкур электр энергияси қўшни давлатларга экспорт қилинган.
“Кам етказиб берилганининг асосий сабаби шундаки, май ойида тарифлар ўзгариши фонида аҳоли истеъмолчилари электр энергиясидан тежамкорлик билан фойдаланишган. Саноат корхоналари эса, прогнозга нисбатан белгиланган ҳажмларда электр энергияси истеъмол қилган”, - дея маълум қилмоқда вазирлик.
Таъкидланишича, ҳозирги кунда 8 та қуёш фотоэлектр ва битта шамол электр станцияси ишга туширилган бўлиб, улар кундуз куни 2000 МВт (умумий ишлаб чиқаришнинг 20 фоизи)гача “яшил” энергия ишлаб чиқармоқда. Бунинг ёрдамида импорт ҳажми кескин камайган.
“Айтиш мумкинки, бугунги кунда юртимизда электр энергия ишлаб чиқариш билан боғлиқ ҳеч қандай муаммо йўқ. Аксинча, бундан буён мамлакатимизда “яшил” электр станцияциялар қуввати ошириб борилаверади ва электр энергияси истеъмолга (талабга) нисбатан кўпроқ ишлаб чиқарилишига эришилади”, - дея маълум қилинмоқда тарқатилган хабарда.
Шунингдек, май ойида 3 554,8 млн куб метр табиий газ қазиб олинган. Бу ўтган йилнинг мос давридагига нисбатан 41 млн куб метр камни ташкил этган. Бунда табиий газ қазиб чиқариш ҳажмлари камайиши Қандим газни қайта ишлаш заводи ва “Жарқудуқ” газни комплекс тайёрлаш қурилмасида режавий таъмирлаш ишлари ва бошқа технологик сабабларга кўра юзага келган.