![Detail image](https://dnews.uz/img/assets_front/img/news/aniq/aniq669f80d0e33b1.jpeg)
Ўзбекистон элчиси Равшан Усманов Британиядаги имконияти чекланган актёрлар театри "Graeae Theatre Company"нинг таълим ва ўқитиш бўйича менежери Мэтте Филипсен билан учрашув ўтказди, деб хабар қилмоқда "Дунё" АА мухбири.
"Graeae Theatre Company" 1980 йилда ногирон ва жисмоний имконияти чекланган актёрлар учун ўз иқтидорларини намоён этиш мақсадида ташкил этилган. У ушбу йўналишдаги Британиядаги илк санъат муассасаларидан бири ҳисобланади.
Мэтте Филипсен Ўзбекистонда ногиронлиги бўлган фуқароларга, шу жумладан болаларга яратилаётган зарур шароитлар, уларни ўқитиш, касб-ҳунарга ўргатиш ва муносиб иш ўринларини яратиш борасида олиб борилаётган кенг кўламли ислоҳотларни юқори баҳолади.
"Graeae Theatre Company" ташкилоти ҳам 40 йилдан ортиқ вақт мобайнида турли ёшдаги имконияти чекланган инсонлар учун самарали ижодий майдон яратиб келмоқда. Бундан асосий мақсад – ногирон ва маргинал гуруҳларнинг овозини театр орқали жамиятга эшиттириш ҳамда одамларнинг ногиронлик ҳақидаги тушунчаларини ижобий томонга ўзгартиришдир", деди у.
Учрашув якунида "Graeae Theatre Company" ва республиканинг тегишли идоралари ўртасида имконияти чекланган инсонлар учун театр саҳналарини ташкил этиш, сценарийлар ёзиш ҳамда ушбу йўналишда тегишли мутахассисларни тайёрлаш соҳаларида ҳамкорлик ўрнатиш тўғрисида келишиб олинди.