Молдова аҳолисининг 55 фоизи республиканинг Шимолий Атлантика альянсига киришига қарши эканини билдирди.

Буни Молдованинг Date Inteligente (iData) маълумотлар йиғиш ва таҳлил қилиш компанияси томонидан ўтказилган ижтимоий сўровнома натижалари кўрсатди.

Молдова аҳолисидан мамлакатнинг НАТОга киришини қўллаб-қувватлайсизми ёки йўқми деган саволга жавоб бериш сўралди.

Сўровнома 2 декабрдан 15 декабрга қадар ўтказилиб, 387 та аҳоли пунктларидан 997 нафар фуқаро иштирок этди.

Аввалроқ Молдова Президенти Майя Санду Politico нашрига берган интервьюсида мамлакат йирик ҳарбий иттифоққа қўшилиш учун бетарафликдан воз кечиши кераклигини айтган эди. Газетанинг қайд этишича, Санду НАТОни алоҳида тилга олмаган, бироқ аввалроқ аҳоли Шимолий Атлантика альянси билан яқинлашишни ёқласа, нейтраль мақом ҳақидаги конституциявий банд қайта кўриб чиқилиши мумкинлигини бир неча бор таъкидлаган. Мухолифат, жумладан, социалистлар, коммунистлар ва “Шор” партияси мамлакатнинг НАТОга киришига қарши. Молдова Конституциясига кўра, республика нейтраль мақомга эга, бироқ 1994 йилдан буён мамлакат НАТО билан индивидуал шериклик режаси асосида ҳамкорлик қилиб келмоқда, деб хабар беради ria.ru.