Россия Молия вазирлиги меҳнат мигрантларига бир патент асосида Россиянинг бир нечта минтақаларида ишлаш имкониятини берувчи қонун лойиҳасини ишлаб чиқди. Ўзгартиришлар бош вазир Михаил Мишустин ва бош вазир ўринбосари Татяна Голикова топшириғига асосан тайёрланган. Агар қонун қабул қилинса, ўзгартиришлар расмий эълон қилинганидан бир ой ўтиб кучга кириши тахмин қилинмоқда, деб ёзди «Ведомости».

Қайд этилишича, бундай патент бирданига бир нечта ҳудудларда амал қилади.

Ҳозир меҳнат патенти фақат бир ҳудудда ишлаш учун берилади ва бошқа ҳудудга кўчиб ўтгандан кейин мигрант бундай ҳужжатни қайта расмийлаштириши керак.

ЕОИИ мамлакатлари фуқаролари (Арманистон, Беларус, Қозоғистон, Қирғизистон), шунингдек, яшаш учун рухсатнома ёки вақтинчалик яшаш учун рухсатнома эгалари патент ва ишлаш учун рухсат олиш заруратидан озод қилинган.

Таъкидланишича, бир вақтнинг ўзида бир нечта минтақаларда расман ишлаш имконини берувчи патентларнинг жорий қилиниши қурилиш соҳасида меҳнат ресурсларининг ҳаракатчанлигини оширади, бу соҳада чет эл фуқаролари ишчилар умумий сонининг салмоқли улушини ташкил қилади.

Агар битта патентга эга бўлган мигрант минтақалар ўртасида ҳаракатланиш имкониятига эга бўлса, бу «арзон ишчи кучига бўлган эҳтиёжни тезда қондириш» имконини беради.