Россия Ички ишлар вазирлиги сайтидаги қидирув хизматидан Украина президенти Володимир Зеленский ва собиқ президент Петро Порошенко ҳақидаги эслатма йўқолди, деб ёзди «Медиазона».

«Медиазона» хабарига кўра, Украинанинг амалдаги ва собиқ президенти қидирувга берилгани ҳақидаги маълумот тизимга 22 февралдан олдин, Россия Ички ишлар вазирлигининг оккупациядаги Донецк вилояти навбатчи бўлинмаси томонидан киритилган.

Оммавий ахборот воситаларининг эътиборидан сўнг, Россия Ички ишлар вазирлиги Зеленский ва Порошенкони қидирувга бериш тўғрисидаги қарорни Тергов қўмитаси қабул қилганини таъкидлади.

Қайд қилинишича, Зеленский ва Порошенкога нисбатан ўзини ўзи эълон қилган ДХР хавфсизлик кучлари «тажовузкор уруш бошлаш ва олиб бориш», «тақиқланган уруш усулларидан фойдаланиш» моддалари бўйича жиноий иш қўзғатган.