ЕИнинг "энг бахтли" ва "бахтсиз" мамлакатлари рўйхати эълон қилинди. Рўйхат Европа Иттифоқининг расмий статистика агентлиги Eurostat томонидан ташкилотга аъзо мамлакатлар аҳолисининг ўз ҳаётидан қанчалик мамнунлиги ўрганилган ҳолда тузилган.

Сўровномада қатнашган шахслардан келажак ҳақида қанчалик оптимистик ёки вазиятга қараб, қанчалик пессимист экани сўралган.

Европанинг энг бахтли мамлакати деб Австрия давлати топилган. Биринчи учликдан иттифоқнинг энг қашшоқ давлатларидан бири бўлган Полша ва Руминия ҳам жой олган. Европа Иттифоқининг энг бой давлатларидан бири бўлган Германия рўйхатнинг охиридан иккинчи ўринда турибди. Энг қуйи поғонадан эса Болгария жой олган. Маълумотларга кўра, 2021-йилда бахт индексида 7,1 балл тўплаган Германияда жорий йилда бу нисбат 6,5 га тушган.

Германия иқтисодий турғунликдан ташқари, Украинадаги уруш, иммиграциянинг мисли кўрилмаган ўсиши каби муаммолари билан ҳам курашмоқда.

Болгария, Руминия, Литва, Словакия, Португалия, Венгрия, Хорватия, Кипр, Германия ва Словенияда шаҳар аҳолиси ҳаётдан кўпроқ мамнун эканликларини айтишган бўлса, Малта, Австрия, Финляндия, Нидерландия, Белгия, Ирландия, Швеция, Дания ва Люксембургда қишлоқ аҳолиси ўзларини кўпроқ бахтли ҳисоблаши аниқланган.

Бошқа томондан, Европа Иттифоқи мамлакатларидаги 16-29 ёшдаги одамлар 65 ёшдан ошганларга қараганда ҳаётдан қониқиш даражаси юқорироқ бўлган. Фарзандли оилалар, ёлғиз оилаларга қараганда бахтлироқ эканини айтган.