БМТ мамлакатларнинг матбуот эркинлиги принсипидан воз кечишига қарши, деди ташкилот бош котиби вакили Стефан Дюжаррик РИА Новости агентлигига Исроилда “Ал-Жазеера” телеканалининг ёпилишини изоҳлаб.

Якшанба куни Исроил Вазирлар Маҳкамаси Қатарнинг “Ал-Жазеера” телеканалини мамлакатда ёпиш учун овоз берган эди.

“Биз матбуот эркинлигидан воз кечиш ҳақидаги ҳар қандай қарорга қатъий қарши турибмиз. Эркин матбуот жамоатчиликни хабардор қилиш ва улар билан мулоқот қилиш учун бебаҳо хизматни тақдим этади”, – деган Дюжаррик.

Ҳукумат томонидан тасдиқланган чора-тадбирларга каналнинг Исроилдаги офисларини ёпиш, эшиттириш ускуналарини мусодара қилиш, канал ҳисоботларини эфирга узатишни блокировка қилиш, канални кабел ва сунъий йўлдош телевидениеси намойишидан олиб ташлаш, канал сайтларини блокировка қилиш ва бошқалар киради.