Вашингтон Исроилга аниқ бошқариладиган қуролларни сотишни кечиктирди.

Бу ҳақда The Wall Street Journal манбаларга таяниб хабар берди.

Уларнинг сўзларига кўра, гап оддий самолёт ўқ-дориларини бошқариладиган ўқ-дориларга айлантира оладиган 6,5 мингга яқин JDAM йўл-йўриқ тўпламларини сотиш ҳақида бормоқда. Қайд этилишича, АҚШ Конгресси таклиф қилинган 260 миллион долларлик келишув ҳақида январ ойида хабардор қилинган, бироқ қонунчилар ҳеч қачон расмий хабар олмаган. Ўшандан бери АҚШ президенти Жо Байден маъмурияти савдони амалга ошириш учун зарур чораларни кўрмади, деб ёзади The Wall Street Journal.

"Бу, айниқса, Исроилга нисбатан, айниқса уруш даврида, ғайриоддий", деди нашрга конгрессдаги манба, савдо нима учун кечиктирилаётгани сабабларини аниқламай.

Жорий йилнинг март ойидан бери Конгрессни Исроилга 1 миллиард долларлик қурол-яроғ, жумладан, танк ўқ-дорилари, ҳарбий техника ва миномёт снарядлари сотилиши мумкинлиги ҳақида хабардор қилиш жараёни ҳам тўхтаб қолди, деб ёзади газета.