Президент Жо Байден АҚШ тарихидаги энг қатъий экологик стандартларни жорий этишга тайёр. Атроф-муҳитни муҳофаза қилиш агентлиги (EPA) янги эмиссия стандартлари ишлаб чиқилганини эълон қилди.

Дастур 2027 йилдан 2032 йилгача бўлган даврда зарарли моддалар чиқиндиларини деярли 50 фоизга қисқартиришни назарда тутади. Қонун лойиҳасида ички ёнув двигателларига тўғридан-тўғри тақиқ йўқ, бироқ 2032 йилга бориб, азот оксиди ва органик газлар чиқиндилари икки баробарга камайиши керак. Бу ҳақда The New York Times ёзди.

Президент Байден электромобилларга меҳри ўзгача эканини яширмаяпти ва ҳозирги маъмурият атроф-муҳитни муҳофаза қилиш қоидаларини кескин кучайтириш учун ҳаракат қилмоқда.

АҚШ президенти ўз олдига мақсад қўйган: 2030 йилга бориб, янги енгил автомобиллар ва енгил тижорат автомобилларининг ярми ички ёнув двигателларидан воз кечиши керак. Байденнинг асосий рақиби Доналд Трамп эса аксинча, агар Оқ уйга қайтса, иқлим дастурларини бекор қилишга ваъда беряпти.

New York Times газетасига кўра, аслида қонун лойиҳасидан ҳозирги кўринишида ҳеч ким мамнун эмас. Экология фаоллари қонун лойиҳаси автомобил саноати ва йирик нефт компаниялари босими остида ёзилган деб қораламоқда.