“X” (собиқ Twitter)дан фойдаланиш пуллик бўлиши мумкин. Бу ҳақда ижтимоий тармоқ эгаси Илон Маск Исроил бош вазири Бинямин Нетаняху билан учрашувда маълум қилди, дея хабар бермоқда “Forbes” нашри.

Исроил бош вазири Бенямин Нетаняху билан кечган жонли эфирдаги мулоқотида Маск барча фойдаланувчилардан ҳар ой “оз миқдорда” тўлов олиш имкониятини кўриб чиқаётганини қайд этган.

“Ўйлашимча, бу ботларнинг катта армиясига қарши курашиш мумкин бўлган ягона йўл”, — деди тадбиркор.

Маскнинг тушунтиришича, ботларни яратиш “арзимас пул” туради, аммо “Twitter"дан фойдаланиш учун “бир неча доллар” ёки “қанчадир миқдор” тўлаш керак бўлса, бу жуда қимматга тушади.

Шунингдек, у ҳозирда ботлардан фойдаланаётган сунъий интеллект одамларга қараганда ботларни аниқлаш учун мўлжалланган “Captcha” тестларидан яхшироқ ўтишини айтди.