Украина президенти Владимир Зеленский АҚШга ташриф буюрди. У 18 сентябр, душанба куни кечқурун Нью-Йоркка етиб боргач, оғир яраланган Украина аскарлари даволанаётган ва реабилитация қилинаётган Статен-Айленд университети госпиталига келди. Ҳозирда Украина Қуролли кучларининг оёқ-қўлидан айрилган тўққиз нафар ҳарбий хизматчига ушбу шифохонада тиббий ёрдам кўрсатилмоқда.

Зеленский у ерда шифокорлар ва ҳарбийлар билан суҳбатлашди.

“Душманни мағлуб этишингизни кутамиз, соғ бўлинглар, қайтинглар, биз ғалаба қозонамиз”, деди у украиналик аскарларга.

Зеленский ўзининг Telegram саҳифасида ҳарбийларга давлат мукофотларини топширгани ва “украиналикларнинг таслим бўлмаслиги ва умумий ғалаба ҳақида ўта муҳим сўзларни эшитганини” ёзди.

“Йигитларимизга жароҳатларидан фориғ бўлишда ёрдам бераётган шифокорлар жамоасига миннатдорчилик билдираман”, — дея қўшимча қилди у.

Зеленский БМТ Бош Ассамблеясида нутқ сўзлайди

Зеленский 19 сентябр куни БМТ Бош Ассамблеяси сессиясида нутқ сўзлайди. Бундан ташқари, унинг БМТ биноларида ўтказиладиган бошқа қатор тадбирларда, жумладан, Барқарор ривожланиш мақсадлари саммити ва Хавфсизлик кенгаши йиғилишида иштирок этиши режалаштирилган. Шу билан бирга, "муҳим икки томонлама учрашувлар режалаштирилган", дейди Украина президенти. Хусусан, у Бразилия президенти Лула да Силва, шунингдек, Исроил Бош вазири Бинямин Нетаняху билан музокаралар режалари ҳақида маълум қилди.