“Ан-Насср” жамоаси Осиё Чемпионлар Лигаси доирасида “Персеполис”га қарши баҳс учун Теҳронга етиб борди. Аэропортда “Персеполис” вакиллари Криштиану Роналдуга гилам совға қилди.

Аввалроқ, “Персеполис” президенти Ризо Дарвиш Роналду ва “Ан-Насср”нинг бошқа футболчиларига мамлакатда фойдаланиш учун чексиз интернети бор SIM-карталар берилиши ҳақида гапирганди. 

Эронда глобал интернетга кириш иложсиз. Мамлакатдаги ўн минглаб веб-сайтлар блоклангани сабабли ишламайди. 

“Мен Irancell (йирик мобил алоқа оператори) бош директори билан гаплашдим ва унга футболчилар Эронга келганидан то чиқиб кетгунларига қадар чексиз интернет билан таъминлашни хоҳлаётганимизни айтдим”, — дейди Дарвиш.

“Персеполис” ҳамда “Ан-Насср” ўртасидаги учрашув 19 сентябрь куни 23:00 да старт олади.