• 10674.08
  • 12576.20
  • 146.91
weather Тошкент: +26.6°C
Detail image
Бозор расталари ва маиший савдо дўконларидан харид қилганимизда, аввало маҳсулот сифати, унинг яроқлилик муддати ўтган ёки ўтмаганига синчиклаб қараш кўпчиликнинг хаёлига келмайди.

Маҳсулотни харид қилиб бўлгандан сўнг эса, унинг сифати ёки яроқлилик муддати ўтганини билиб, дарров уни алмаштиришга тушамиз. Баъзи сотувчиларимиз алмаштириб беради, баъзилари эса йўқ. Бу эса истеъмолчиларнинг норозилигини келтириб чиқариши табиий. Таъкидлаш жоизки, Ўзбекистон истеъмолчилар ҳуқуқларини ҳимоя қилиш жамиятлари федерациясига ҳам шунга ўхшаш кўплаб мурожаатлар келиб тушмоқда, улардан бири Навоий вилояти Кармана туманида яшовчи фуқаро Т.Рўзиев томонидан келган.

Истеъмолчи ўз мурожаатида, “Artel” компанияси билан шартнома қилиб, кредит (3 йиллик кафолат муддати) эвазига газ плитасини харид қилган. Бироқ, кафолат муддати даврида, яъни 2020 йил декабрь ойида газ плитаси ёниб кетгани боис “Artel” компаниясига мурожаат қилиб таъмирлаб ёки алмаштириб беришини сўраб қилган мурожаати қаноатлантирилмагани, сўнг Ўзбекистон Республикаси Монополияга қарши курашиш қўмитасининг Навоий вилоят ҳудудий бошқармасига қилган шикояти ҳам ижобий ҳал этилмаганлигини айтиб ўтган.

Мазкур мурожаат ўрганилганда эса қуйидагилар маълум бўлди. Фуқаро Т.Рўзиев хонадони учун «Артель» маиший техника савдо дўконидан «Агробанк»нинг 32 фоизлик кредит маблағлари ҳисобидан 3 йиллик кафолат муддати билан газ плитаси сотиб олган. Аммо, ушбу ускуна бир ой муддат ўтмай, носоз ҳолга келиб қолган ва шу сабабли сервис хизмати кўрсатилган. 2020 йилнинг декабрь ойида эса газ плитаси ўчиқ ҳолда ёниб кетганлиги сабабли яна сервис хизматига мурожаат қилганида сервис ходимлари (кафолат муддати тугамай туриб) тузатиб бериш учун фуқародан 900 минг сўм миқдорида хизмат ҳаққи талаб қилган.

Фуқаро бу ҳақда 2021 йилнинг 2 март куни Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигининг «Ишонч телефони»га ёрдам сўраб мурожаат қилган. Агентликнинг вилоят бошқармаси томонидан фуқарога «Ўрганиш натижаларига кўра, носоз ҳолатдаги маҳсулот (яъни газ плита) “New Generations Product” МЧЖнинг сервис маркази мутахассислари томонидан текшириб кўрилганда табиий газнинг кирувчи юқори босими (80 мбар) туфайли газ плитаси ёниб кетганлиги, кафолатли хизмат кўрсатиш қоидаларининг 18, 19-бандларида бепул хизмат кўрсатиш енгиб бўлмас куч таъсирида келиб чиққан носозликларга татбиқ қилинмаслиги кўрсатилганлиги, ушбу жавобдан норози бўлган тақдирда юқори турувчи органга ёки судга мурожаат қилиш ҳуқуқига эга эканлиги» тўғрисида маълум қилинган

Шундан сўнг, Федерациянинг Кармана туман жамияти ходимлари томонидан Фуқаролик ишлари бўйича Кармана туманлараро судига даъво аризаси киритилди. Суд қарорига биноан, фуқаро Т.Рўзиев фойдасига етказилган моддий зарар учун жами 4 млн. 500 минг сўм, маънавий зарар учун 500 минг сўм товон ундирилишига эришилди.

Яна бир мурожаат, Бухоро вилояти Жондор туманида яшовчи фуқаро Р.З. томонидан келган. Унда истеъмолчи, Жондор туманида жойлашган тижорат банкларидан бирига мурожаат қилиб, маиший техника воситаси сотиб олиши учун кредит олмоқчилигини айтган. Банк ходими ва истеъмолчи ўртасида истеъмол кредити билан боғлиқ шартнома тузилиб, унда кўрсатилган 21.500.000 (йигирма бир миллион беш юз минг) сўм маблағ «Артель» маиший техника дўкони ҳисоб рақамига ўтказиб берилган ва маҳсулот 1 ҳафтада истеъмолчининг уйига олиб бориб берилиши таъкидланган. Орадан 2 ҳафта вақт ўтса ҳам, маиший техника воситаларидан хабар бўлмаган. Тадбиркорга бу борада бир неча маротаба мурожаат қилган бўлса-да ҳеч қандай ўзгариш бўлмаганини айтиб ўтган.

Мазкур мурожаат, Федерациянинг Жондор туман жамияти ходимлари томонидан ўрганилиши натижасида истеъмолчининг талабига асосан маиший техника жиҳозлари мавжуд бўлмаганлиги ва яқин орада етказиб беролмаслиги сабабли «Халқ банки» билан тузилган шартнома бекор қилиниб, 21 500 000 сўм пул маблағлари банк ҳисоб-рақамига қайтарилди, шунингдек, «Халқ банки» томонидан бошқа маиший техника дўкони билан шартнома тузилиб, 21 500 000 сўм пул маблағи кўчирилди ҳамда истеъмолчига маиший техника жиҳозлари олиб берилди.

Ўзбекистон истеъмолчилар ҳуқуқларини ҳимоя қилиш

жамиятлари федерацияси Матбуот хизмати

Ўхшаш янгиликлар